लोकस्रजि द्यौर्दिवि चादितेया अप्यादितेयेषु महान्महेन्द्रः । किंकर्तुमर्थी यदि सोऽपि रागाज्जागर्ति कक्षा किमतः परापि ॥
Metre: इन्द्रवज्रा
पदं शतेनाप मखैर्यदिन्द्रः तस्मै स ते याचनचाटुकारः । कुरु प्रसादं तदलंकुरुष्व स्वीकारकृद्भ्रूनटनश्रमेण ॥
Metre: उपजातिः
मन्दाकिनीनन्दनयोर्विहारे देवे धवे देवरि माधवे च । श्रेयः श्रिया यातरि यच्च सख्यां तच्चेतसा भाविनि ! भावयस्व ॥
Metre: इन्द्रवज्रा
रज्यस्व राज्ये जगतामितीन्द्रात्याच्ञाप्रतिष्ठां लभसे त्वमेव । लघूकृतस्वं बलियाचनेन तत्प्राप्तये वामनमामनन्ति ॥
Metre: उपजातिः
यानेव देवान्नमसि त्रिकालं न तत्कृतघ्नीकृतिरौचिती ते । प्रसीद तानप्यनृणान्विधातुं पतिष्यतस्त्वत्पदयोस्त्रिसंध्यम् ॥
Metre: उपजातिः
इत्युक्तवत्या निहितादरेण भैम्या गृहीता मघवत्प्रसादः । स्रक्पारिजातस्य ऋते नलाशां वासैरशेषामपुरूपदाशाम् ॥
Metre: इन्द्रवज्रा
आर्ये ! विचार्यालमिहेति कापि योग्यं सखि ! स्यादिति काचनापि । ओंकार एवोत्तरमस्तु वस्तु मङ्गल्यमत्रेति च काप्यवोचात् ॥
Metre: इन्द्रवज्रा
अनाश्रवा वः किमहं कदापि वक्तुं विशेषः परमस्ति शेषः । इतीरिते भीमजया न दूतीम् आलिङ्गदालीश्च मुदामियत्ता ॥
Metre: उपजातिः
भैमीं च दूत्यं च न किंचिदापम् इति स्वयं भावयतो नलस्य । आलोकमात्राद्यदि तन्मुखेन्दोः अभून्न भिन्नं हृदयारविन्दम् ॥
Metre: उपजातिः
ईषत्स्मितक्षालितसृक्विभागा दृक्संज्ञया वारिततत्तदालिः । स्रजा नमस्कृत्य तयैव शक्रं तां भीमभूरुत्तरयांचकार ॥
Metre: उपजातिः