दूत्याय दैत्यारिपतेः प्रवृत्तो द्विषां निषेद्धा निषधप्रधानम् । स भीमभूमीपतिराजधानीं लक्षीचकाराथ रथस्यदस्य ॥
Metre: उपजातिः
भैम्या समं नाजगणद्वियोगं स दूतधर्मे स्थिरधीरधीराः । पयोधिपाने मुनिरन्तरायं दुर्वारमप्यौर्वसिवौर्वशेयः ॥
Metre: उपजातिः
नलप्रणालीमिलदम्बुजाक्षीसंवादपीयूषपिपासवस्ते । तदध्ववीक्षार्थमिवानिमेषा देशस्य तस्याभरणीबभूवुः ॥
Metre: उपजातिः
तां कुण्डिनाख्यापदमात्रगुप्ताम् इन्द्रस्य भूमेरमरावतीं सः । मनोरथः सिद्धिमिव क्षणेन रथस्तदीयः पुरमाससाद ॥
Metre: उपजातिः
भैमीपदस्पर्शकृतार्थरथ्या सेयं पुरीत्युत्कलिकाकुलस्ताम् । नृपौ निपीय क्षणमीक्षणाभ्यां भृशं निराश्वास सुरैः क्षताशः ॥
Metre: उपजातिः
स्विद्यत्प्रमोदाश्रुलवेन वामं रोमाञ्चभृत्पक्ष्मभिरस्य चक्षुः । अन्यत्पुनः कम्प्रमपि स्फुरत्त्वात्तस्याः पुरः प्राप नवोपभोगम् ॥
Metre: इन्द्रवज्रा
रथादसौ सारथिना सनाथा द्राजावतीर्याथ पुरं विवेश । निर्गत्य बिम्बादिव भानवीयात्सौधाकरं मण्डलमंशुसङ्घः ॥
Metre: उपजातिः
चित्रं तदा कुण्डिनवेशिनः सा नलस्य मूर्तिर्ववृते न दृश्या । बभूव तच्चित्रतरं तथापि विश्वैकदृश्यैव यदस्य मूर्तिः ॥
Metre: उपजातिः
जनैर्विदग्धैर्भवनैश्च मुग्धैः पदे पदे विस्मयकल्पवल्लीम् । तां गाहमानास्य चिरं नलस्य दृष्टिर्ययौ राजकुलातिथित्वम् ॥
Metre: उपजातिः
हेलां दधौ रक्षिजनेऽस्त्रसज्जे लीनश्चरामीति हृदा ललज्जे । द्रक्ष्यामि भैमीमिति संतुतोष दूतं विचिन्त्य स्वमसौ शुशोच ॥
Metre: इन्द्रवज्रा