मीलन्न शेकेऽभिमुखागताभ्यां धर्तुं निपीड्य स्तनसान्तराभ्याम् । स्वाङ्गान्यपेतो विजगौ स पश्चात्पुमङ्गसङ्गोत्पुलके पुनस्ते ॥
Metre: उपजातिः
निमीलनस्पष्टविलोकनाभ्यां कदर्थितस्ताः कलयन्कटाक्षैः । स रागदर्शीव भृशं ललज्जे स्वतः सतां ह्रीः परतोऽतिगुर्वी ॥
Metre: उपेन्द्रवज्रा
रोमाञ्चिताङ्गीमनु तत्कटाक्षैः भ्रान्तेन कान्तेन रतेर्निदिष्टः । मोघः शरौघः कुसुमानि नाभूत्तद्धैर्यपूजां प्रति पर्यवस्यन् ॥
Metre: इन्द्रवज्रा
हित्वैव वर्त्मैकमिह भ्रमन्त्याः स्पर्शः स्त्रियाः सुत्यज इत्यवेत्य । चतुष्पथस्याभरणं बभूव लोकावलोकाय सतां स दीपः ॥
Metre: उपजातिः
उद्वर्तयन्त्या हृदये निपत्य नृपस्य दृष्टिर्न्यवृतद्द्रुतैव । वियोगिवैरात्कुचयोर्नखाङ्कैः अर्धेन्दुलीलैर्गलहस्ततेव ॥
Metre: उपजातिः
तन्वीमुखं द्रागधिगत्य चन्द्रं वियोगिनस्तस्य मिमीलिताभ्याम् । द्वयं द्रढीयः कृतमीक्षणाभ्यां तदिन्दुता च स्वसरोजता च ॥
Metre: उपजातिः
चतुष्पथे तं विनिमीलिताक्षं चतुर्दिगेताः सुखमग्रहीष्यन् । संघट्ट्य तस्मिन्भृशभीनिवृतात्तस्ता एव तद्वर्त्म न चेददास्यन् ॥
Metre: उपेन्द्रवज्रा
संघट्टयन्त्यास्तरसात्मभूषाहीराङ्कुरप्रोतदुकूलहारी । दिशा नितम्बं परिधाप्य तन्व्याः तत्पापसंतापमवाप भूपः ॥
Metre: उपजातिः
हतः कयाचित्पथि कन्दुकेन संघट्ट्य भिन्नः करजैः कयापि । कयाचनाक्तः कुचकुङ्कुमेन संभुक्तकल्पः स बभूव ताभिः ॥
Metre: उपजातिः
छायामयः प्रैक्षि कयापि हारे निजे स गच्छन्नथ नेक्ष्यमाणः । तच्चिन्तयान्तर्निरचायि चारु स्वस्यैव तन्व्या हृदयं प्रविष्टः ॥
Metre: उपजातिः