दिक्-कालाद्यनवच्छिन्नानन्त-चिन्-मात्र-मूर्तये । स्वानुभूत्य्-एक-मानाय नमः शान्ताय तेजसे ॥
Metre: अनुष्टुप्
बोद्धारो मत्सर-ग्रस्ताः प्रभवः स्मय-दूषिताः ।अबोधोपहताः चान्ये जीर्णमङ्गे सुभाषितम् ॥
Metre: अनुष्टुप्
अज्ञः सुखमाराध्यः सुखतरमाराध्यते विशेषज्ञः । ज्ञान-लव-दुर्विदग्धं ब्रह्मापि तं नरं न रञ्जयति ॥
Metre: उद्गीति
प्रसह्य मणिमुद्धरेन्मकर-वक्त्र-दंष्ट्रान्तरात्समुद्रमपि सन्तरेत्प्रचलदूर्मि-मालाकुलम् । भुजङ्गमपि कोपितं शिरसि पुष्पवद्धारयेत्न तु प्रतिनिविष्ट-मूर्ख-जन-चित्तमाराधयेत् ॥
Metre: पृथ्वी
लभेत सिकतासु तैलमपि यत्नतः पीडयन्पिबेच्च मृग-तृष्णिकासु सलिलं पिपासार्दितः । कदाचिदपि पर्यटन् शशविषाणमासादयेन्नतु प्रतिनिविष्ट-मूर्ख-जन-चित्तमाराधयेत् ॥
Metre: पृथ्वी
व्यालं बाल-मृणाल-तन्तुभिरसौ रोद्धुं समुज्जृम्भते छेत्तुं वज्र-मणिं शिरीष-कुसुम-प्रान्तेन सन्नह्यति । माधुर्यं मधु-बिन्दुना रचयितुं क्षारामुधेरीहते नेतुं वाञ्छन्ति यः खलान्पथि सतां सूक्तैः सुधा-स्यन्दिभिः ॥
Metre: शार्दूलविक्रीडितम्
स्वायत्तमेकान्त-गुणं विधात्रा विनिर्मितं छादनमज्ञतायाः । विशेषतः सर्व-विदां समाजे विभूषणं मौनमपण्डितानाम् ॥
Metre: उपेन्द्रवज्रा
यदा किञ्चिज्-ज्ञोऽहं द्विप इव मदान्धः समभवं तदा सर्वज्ञोऽस्मीत्यभवदवलिप्तं मम मनः । यदा किञ्चित्किञ्चिद्बुधजन-सकाशादवगतं तदा मूर्खोऽस्मीति ज्वर इव मदो मे व्यपगतः ॥
Metre: शिखरिणी
कृमि-कुल-चितं लाला-क्लिन्नं विगन्धि-जुगुप्सितं निरुपम-रसं प्रीत्या खादन्नरास्थि निरामिषम् । सुरपतिमपि श्वा पार्श्वस्थं विलोक्य न शङ्कते न हि गणयति क्षुद्रो जन्तुः परिग्रह-फल्गुताम् ॥
Metre: हरिणी
शिरः शार्वं स्वर्गात्पशुपति-शिरस्तः क्षितिधरं म्हीध्रादुत्तुङ्गादवनिमवनेश्चापि जलधिम् । अधोऽधो गङ्गेयं पदमुपगता स्तोकमथवाविवेक-भ्रष्टानां भवति विनिपातः शतमुखः ॥
Metre: शिखरिणी