अन्योन्यमन्यत्रवदीक्षमाणौ परस्परेणाध्युषितेऽपि देशे । आलिङ्गितालीकपरस्परान्तः तथ्यं मिथस्तौ परिषस्वजाते ॥
Metre: उपजातिः
स्पर्शे तमस्याधिगतापि भैमी मेने पुनर्भ्रान्तिमदर्शनेन । नृपः स पश्यन्नपि तामुदीतस्तम्भो न धर्तुं सहसा शशाक ॥
Metre: उपजातिः
स्पर्शातिहर्षादृतसत्यमत्या प्रवृत्य मिथ्याप्रतिलब्धबाधौ । पुनर्मिथस्तथ्यमपि स्पृशन्तौ न श्रद्दधाते पथि तौ विमुग्धौ ॥
Metre: उपजातिः
सर्वत्र संवाद्यमबाधमानौ रूपश्रियातिथ्यकरं परं तौ । न शेकतुः केलिरसाद्विरन्तु मलीकमालोक्य परस्परं तु ॥
Metre: उपजातिः
परस्परस्पर्शरसोर्मिसेकात्तयोः क्षणं चेतसि विप्रलम्भः । स्नेहातिदानादिव दीपिकार्चिः निमिष्य किंचिद्द्विगुणं दिदीपे ॥
Metre: उपजातिः
वेश्माप सा धैर्यवियोगयोगाद्बोधं च मोहं च मुहुर्दधाना । पुनः पुनस्तत्र पुरः स पश्यन्बभ्रामतां सुभ्रुवमुद्भ्रमेण ॥
Metre: उपजातिः
पद्भ्यां नृपः संचरमाण एष चिरं परिभ्रम्य कथंकथंचित् । विदर्भराजप्रभवाभिरामं प्रासादमभ्रंकषमाससाद ॥
Metre: उपजातिः
सखीशतानां सरसैर्विलासैः स्मरावरोधभ्रममावहन्तीम् । विलोकयामास सभां स भैम्याः तस्य प्रतोलीमणिवेदिकायाम् ॥
Metre: उपजातिः
कण्ठः किमस्याः पिकवेणुवीणाः तिस्रो जिताः सूचयति त्रिरेखः । इत्यन्तरस्तूयत यत्र कापि नलेन बाला कलमालपन्ती ॥
Metre: उपजातिः
एतं नलं तं दमयन्ति ! पश्य त्यजार्तिमित्यालिकुलप्रबोधान् । श्रुत्वा स नारीकरवर्तिसारीमुखात्स्वमाशङ्कत यत्र दृष्टम् ॥
Metre: उपजातिः