कापि कामपि बभाण बुभुत्सुं शृण्वति त्रिदशभर्तरि किंचित् । एष कश्यपसुतामभिगन्ता पश्य कश्यपसुतः शतमन्युः ॥
Metre: स्वागता
आलिमात्मसुभगत्वसगर्वा कापि शृण्वति मघोनि बभाषे । वीक्षणेऽपि सघृणासि नृणां किं यासि न त्वमपि सार्थगुणेन ॥
Metre: स्वागता
अन्वयुर्द्युतिपयः पितृनाथाः तंमुदाथ हरितां कमितारः । वर्त्म कर्षतु पुरः परमेकस्तद्गतानुगतिको न महार्घः ॥
Metre: स्वागता
प्रेषिताः पृथगथो दमयन्त्यै चित्तचौर्यचतुरा निजदूत्यः । तद्गुरुं प्रति च तैरुपहाराः संख्यसौख्यकपटेन निगूढाः ॥
Metre: स्वागता
चित्रमत्र विबुधैरपि यत्तैः स्वर्विहाय बत भूरनुसस्रे । द्यौर्न काचिदथवास्ति निरुढा सैव सा चलति यत्र हि चित्तम् ॥
Metre: आर्यागीति
किं घनस्य जलधेरथवैवं नैव संशयितुमप्यलभन्त । स्यन्दनं परमदूरमपश्यन्निःस्वनश्रुतिसहोपनतं ते ॥
Metre: स्वागता
सूतविश्रमदकौतुकिभावं भावबोधचतुरं तुरगाणाम् । तत्र नेत्रजनुषः फलमेते नैषधं बुबुधिरे विबुधेन्द्राः ॥
Metre: स्वागता
वीक्ष्य तस्य वरुणस्तरुणत्वं तद्बभार निबिडं जडभूयम् । नौचिती जलपतेः किमु सास्य प्राज्यविस्मयरसस्तिमितस्य ॥
Metre: स्वागता
रूपमस्य विनिरूप्य तथातिम्लानिमाप रविवंशवतंसः । कीर्त्यते यदधुनापि स देवः काल एव सकलेन जनेन ॥
Metre: स्वागता
यं बभार दहनः खलु तापं रूपधेयभरमस्य विमृश्य । तत्र भूदनलता जनिकर्त्री मा तदप्यनलतैव तु हेतुः ॥
Metre: स्वागता