मन्मथाय यदथादित राज्ञां हूतिदूत्यविधये विधिराज्ञाम् । तेन तत्परवशाः पृथिवीशाः संगरं गरमिवाकलयन्ति ॥
Metre: स्वागता
येषु येषु सरसा दमयन्ती भूषणेषु यदि वापि गुणेषु । तत्र तत्र कलयापि विशेषो यः स हि क्षितिभृतां पुरुषार्थः ॥
Metre: स्वागता
शैशवव्ययदिनावधि तस्या यौवनोदयिनि राजसमाजे । आदरादहरहः कुसुमेषोः उल्ललास मृगयाभिनिवेशः ॥
Metre: स्वागता
इत्यमी वसुमतीकमितारः सादरास्त्वदतिथीभवितुं न । भीमभूसुरभुवोरभिलापे दूरमन्तरमहो नृपतीनाम् ॥
Metre: स्वागता
तेन जाग्रदधृतिर्दिवमागां संख्यसौख्यमनुसर्तुमनु त्वाम् । यन्मृधं क्षितिभृतां न विलोके तन्निमग्नमनसां भुवि लोके ॥
Metre: स्वागता
वेद यद्यपि न कोऽपि भवन्तं हन्त हन्त्रकरुणं विरुणद्धि । पृच्छ्यसे तदपि येन विवेकप्रोञ्छनाय विषये रससेकः ॥
Metre: स्वागता
एवमुक्तवति देवऋषीन्द्रे द्रागभेदि मघवाननमुद्रा । उत्तरोत्तरशुभो हि विभूनां कोऽपि मञ्जुलतमः क्रमवादः ॥
Metre: स्वागता
कानुजे मम निजे दनुजारौ जाग्रति स्वशरणे रणचर्चा । यद्भुजाङ्कमुपधाय जयाङ्कं शर्मणा स्वपिमि वीतविशङ्कः ॥
Metre: स्वागता
विश्वरूपकलनादुपपन्नं तस्य जैमिनिमुनित्वमुदीये । विग्रहं मखभुजामसहिष्णुः व्यर्थतां मदशनिं स निनाय ॥
Metre: स्वागता
ईदृशानि मुनये विनयाब्धिः तस्थिवान्स वचनान्युपहृत्य । प्रांशुनिःश्वसितपृष्ठचरी वाङ्नारदस्य निरियाय निरोजाः ॥
Metre: स्वागता