सर्वतः कुशलवानसि किच्चित्वं स नैषध इति प्रतिभा नः । स्वासनार्धसुहृदस्त्वयि रेखां वीरसेननृपतेरिव विद्मः ॥
Metre: स्वागता
क्व प्रयास्यसि नलेत्यलमुक्त्वा यात्रयात्र शुभयाजनि यन्नः । तत्तयैव फलसत्वरया त्वं नाध्वनोऽर्धमिदमागमितः किम् ॥
Metre: स्वागता
एष नैषध ! स दण्डभृदेष ज्वालजालजटिलः स हुताशः । यादसां स पतिरेष च शेषं शासितारमधिगच्छ सुराणाम् ॥
Metre: स्वागता
अर्थितो वयममी समुपेमः त्वां नलेति फलितार्थमवेहि । अध्वनः क्षणमपास्य च खेदं कुर्महे भवति कार्यनिवेदम् ॥
Metre: स्वागता
ईदृशीं गिरमुदीर्य बिडौजा जोषमास न विशिष्य बभाषे । नात्र चित्रमभिधाकुशलत्वे शैशवावधि गुरुर्गुरुरस्य ॥
Metre: स्वागता
अर्थिनामहृषिताखिललोमा स्वं नृपः स्फुटकदम्बकदम्बम् । अर्चनार्थमिव तच्चरणानां स प्रणामकरणादुपनिन्ये ॥
Metre: स्वागता
दुर्लभं दिगधिपैः किममीभिः तादृशं कथमहो मदधीनम् । ईदृशं मनसिकृत्य विरोधं नैषधेन समशायि चिराय ॥
Metre: स्वागता
जीवितावधि वनीयकमात्रैः याच्यमानमखिलैः सुलभं यत् । अर्थिने परिवृढाय सुराणां किं वितीर्य परितुष्यति चेतः ॥
Metre: स्वागता
भीमजा च हृदि मे परमास्ते जीवितादपि धनादपि गुर्वी । न स्वमेव मम सार्हति यस्याः षोडशीमपि कलां किल नोर्वी ॥
Metre: स्वागता
मीयतां कथमभीप्सितमेषां दीयतां कथमयाचितमेव । तं धिगस्तु कलयन्नपि वाञ्छाम् अर्थिवागवसरं सहते यः ॥
Metre: स्वागता