तं मनो-हरमागत्य गिरिं वर्म-हरौ कपिः । वीरौ सुखाऽऽहरोऽवोचद्भिक्षुर्भिक्षार्ह-विग्रहः ॥
Metre: अनुष्टुप्
"बलिनावमूमद्रीन्द्रं युवां स्तम्बे-रमाविव ।आचक्षाथां मिथः कस्माच्छङ्करेणाऽपि दुर्गमम् ॥
Metre: अनुष्टुप्
व्याप्तं गुहा-शयैः क्रूरैः क्रव्याद्भिः स-निशाचरैः । तुङ्ग-शैल-तरु-छन्नं मानुषाणाम-गोचरम् ॥
Metre: अनुष्टुप्
सत्वमेजय-सिंहाऽऽढ्यान्स्तनं-धाय-सम-त्विषौ । कथं नाडिंधमान्मार्गानागतौ विषमोपलान् ॥
Metre: अनुष्टुप्
अत्तीर्णौ वा कथं भीमाः सरितः कूलमुद्वहाः ।आसादितौ कथं ब्रूतं न गजैः कूलमुद्रुजैः ॥
Metre: अनुष्टुप्
रामोऽवोचद्धनूमन्तम् "आवामभ्रं-लिहं गिरिम् ।ऐव विद्वन्! पितुः कामात्पान्तावल्पं-पचान्मुनीन् ॥
Metre: अनुष्टुप्
अ-मितं-पचमीशानं सर्व-भोगीणमुत्तमम् ।आवयोः पितरं विद्धि ख्यातं दशर्थं भुवि ॥
Metre: अनुष्टुप्
छलेन दयिताऽरण्याद्रक्षसाऽरुं-तुदेन नः ।अ-सूर्यं-पश्यया मूर्त्या हृता तां मृगयावहे।" ॥
Metre: अनुष्टुप्
प्रत्यूचे मारुति रामम् "अस्ति वालीति वानरः" । शमयेदपि संग्रामे यो ललाटं-तपं रविम् ॥
Metre: अनुष्टुप्
उग्रं-पश्येन सुग्रीवस्तेन भ्राता निराकृतः । तस्य मित्रीयतो दूतः संप्राप्तोऽस्मि वशं-वदः ॥
Metre: अनुष्टुप्