अवसायो भविष्यामि दुःखस्याऽस्य कदा न्वहम् । न जीवस्याऽवहारो मां करोति सुखिनं यमः ॥
Metre: अनुष्टुप्
दह्येऽहं मधुनो लेहैर्दावैरुग्रैर्यथा गिरिः । नायः कोऽत्र स येन स्यां बताऽहं विगत-ज्वरः ॥
Metre: अनुष्टुप्
समाविष्टं ग्रहेणेव ग्राहेणेवाऽऽत्तमर्णवे । दृष्ट्वा गृहान्स्मरस्येव वनाऽन्तान्मम मानसम् ॥
Metre: अनुष्टुप्
वाताऽऽहति-चलच्-छाखा नर्तका इव शाखिनः । दुःसहा ही परिक्षिप्ताः क्वणद्भिरलि-गाथकैः ॥
Metre: अनुष्टुप्
एक-हायन-सारङ्ग-गती रघु-कुलोत्तमौ । लवकौ शत्रु-शक्तीनामृष्यमूकमगच्छताम् ॥
Metre: अनुष्टुप्
तौ वालि-प्रणिधी मत्वा सुग्रीवोऽचिन्तयत्कपिः । "बन्धुना विगृहीतोऽहं भूयासं जीवकः कथम्।" ॥
Metre: अनुष्टुप्
स शत्रु-लावौ मन्वानो राघवौ मलयं गिरिम् । जगाम स-परीवारो व्योम-मायमिवोत्थितम् ॥
Metre: अनुष्टुप्
शर्म-दं मारुतिं दूतं विषम-स्थः कपि-द्विपम् । शोकाऽपनुदम-व्यग्रं प्रायुङ्क्त कपि-कुञ्जरः ॥
Metre: अनुष्टुप्
विश्वास-प्रद-वेषोऽसौ पथि-प्रज्ञः समाहितः । चित्त-संख्यो जिगीषूणामुत्पपात नभस्-तलम् ॥
Metre: अनुष्टुप्
सुरा-पैरिव घूर्णद्भिः शाखिभिः पवनाऽऽहतैः । ऋष्यमूकमगाद्भृङ्गैः प्रगीतं साम-गैरिव ॥
Metre: अनुष्टुप्