दीव्यमानं शितान्बाणानस्यमानं महा-गदाः । निघ्नानं शात्रवान्रामं कथं त्वं नाऽवगच्छसि ॥
Metre: अनुष्टुप्
भ्रातरि न्यस्य यातो मां मृगाविन्मृगयामसौ ।एषितुं प्रेषितो यातो मया तस्याऽनु-जो वनम् ॥
Metre: अनुष्टुप्
अथाऽऽयस्यन्कषायाऽक्षः स्यन्न-स्वेद-कणोल्बणः । संदर्षिताऽऽन्तराकूतस्तामवादीद्दशाननः ॥
Metre: अनुष्टुप्
"कृते कानिष्ठिनेयस्य ज्यैष्ठिनेयं विवासितम् । को नग्न-मुषित-प्रख्यं बहु मन्येत राघवम् ॥
Metre: अनुष्टुप्
राक्षसान्बटु-यज्ञेषु पिण्डी-शूरान्निरस्तवान् । यद्यसौ कूप-माण्डूकि ! तवैतावति कः स्मयः ॥
Metre: अनुष्टुप्
मत्-पराक्रम-संक्षिप्त-राज्य-भोग-परिच्छदः । युक्तं ममैव किं वक्तुं दरिद्राति यथा हरिः ॥
Metre: अनुष्टुप्
निर्-लङ्को विमदः स्वामी धनानां हृत-पुष्पकः ।अध्यास्तेऽन्तर्-गिरं यस्मात्कस्तन्नाऽवैति कारणम् ॥
Metre: अनुष्टुप्
भिन्न-नौक इव ध्यायन्मत्-तो बिभ्यद्यमः स्वयम् । कृष्णि-मानं दधानेन मुखेनाऽऽस्ते निरुद्यतिः ॥
Metre: अनुष्टुप्
समुद्रोपत्यका हैमी पर्वताऽधित्यका पुरी । रत्न-पारायणं नाम्ना लङ्केति मम मैथिलि ! ॥
Metre: अनुष्टुप्
आवासे सिक्त-संमृष्टे गन्धैस्त्वं लिप्त-वासिता ।आर्पितोरु-सुगन्धि-स्रक्तस्यां वस मया सह ॥
Metre: अनुष्टुप्