अतिप्रियत्वान्न हि मे कातरं प्रतिपद्यते । चेतो वालि-वधं राम ! क्लेशापहमुपस्थितम् ॥
Metre: अनुष्टुप्
शीर्ष-घातिनमायातमरीणां त्वां विलोकयन् । पतिघ्नी-लक्ष्मणोपतां मन्येऽहं वालिनः श्रियम् ॥
Metre: अनुष्टुप्
शत्रुघ्नान्युधि हस्तिघ्नो गिरीन्क्षिप्यन्न-कृत्रिमान् । शिल्पिभिः पाणिघैः क्रुद्धस्त्वया जय्योऽभ्युपाय-वान् ॥
Metre: अनुष्टुप्
आढ्यं-करण-विक्रान्तो महिषस्य सुरद्विषः । प्रियं-करणमिन्द्रस्य दुष्करं कृतवान्वधम् ॥
Metre: अनुष्टुप्
प्रियंभावुकतां यातस्तं क्षिपन्योजनं मृतम् । स्वर्गे प्रियं-भविष्णुश्च क्र्त्स्नं शक्तोऽप्यबाधयन्" ॥
Metre: अनुष्टुप्
जिज्ञासोः शक्तिमस्त्राणां रामो न्यून-धियः कपेः ।अभीनत्प्रतिपत्त्यर्थं सप्त व्योम स्पृशस्तरून् ॥
Metre: अनुष्टुप्
ततो वालि-पशौ वध्ये राम-र्त्विग्-जित-साध्वसः ।अभ्यभून्निलयं भ्रातुः सुग्रीवो निनदन्दधृक् ॥
Metre: अनुष्टुप्
गुहाया निरगाद्वाली सिंहो मृगमिव द्युवन् । भ्रातरं युङ्भियः संख्ये घोषेणाऽऽपूरयन्दिशः ॥
Metre: अनुष्टुप्
व्यायच्छमानयोर्मूढो भेदे सदृशयोस्तयोः । बाणमुद्यतमायंसीदिक्ष्वाकु-कुल-नन्दनः ॥
Metre: अनुष्टुप्
ऋष्यमूकमगात्क्लन्तः कपिर्मृग-सदृग्द्रुतम् । किष्किन्धाऽद्रिसदाऽऽत्यर्थं निष्पिष्टः कोष्णमुच्छ्वसन् ॥
Metre: अनुष्टुप्