साध्यत्वेन निमित्तानि क्रियापदमपेक्षते॥
एवं च सन्निहितयोग्याकाङ्क्षितोपरक्ते स्वार्थे क्वचिद्गृहीतसम्बन्धः सर्वत्र गृहीतो भवतीति नानन्त्यव्यभिचाराभ्यां सम्बन्धाग्रहणम्। न च कदम्बकार्थप्रतीतेः पदार्थात्प्रविभागः। तदुक्तम्—
आकाङ्क्षासन्निधिप्राप्तयोग्यार्थान्तरसङ्गतान्।
स्वार्थानाहुः पदानीति व्युत्पत्तिः संश्रिता यदा॥ ६९॥
आनन्त्यव्यभिचाराभ्यां तदा दोषो न कश्चन।
कदम्बकार्थरूपायाः प्रतीतेश्च न सम्भवः॥ ७०॥
इति। ततश्च पदपदार्थयोस्सम्बन्धग्रहणोपपत्तौ न प्रथम(म)श्रुतापि पदादर्थप्रतीतिः, न गामानयेति वाक्यादश्वबन्धननियोगः (न्यायमञ्जरी) न प्रतिवाक्यं व्युत्पत्त्यपेक्षा, न चाभिनवकविश्लोकवाक्यार्थप्रतीतिर्भवतीति।