उदक्शतवलिं कोट्या सुषेणं पक्षिमां तथा । दिशं प्रास्थापयद्राजा वानराणां कृत-त्वरः ॥
Metre: अनुष्टुप्
प्राचीं तावद्भिर-व्यग्रः कपिभिर्विनतो ययौ ।अ-प्रग्राहैरिवाऽऽदित्यो वाजिभिर्-दूर-पातिभिः ॥
Metre: अनुष्टुप्
ययुर्विन्ध्यं शरन्-मेघैः प्रावारैः प्रवरैरिव । प्रच्छन्नं मारुति-प्रष्ठाः सीतां द्रष्टुं प्लवङ्गमाः ॥
Metre: अनुष्टुप्
परिभावं मृगेन्द्राणां कुर्वन्तो नग-मूर्धसु । विन्ध्ये तिग्मांशु-मार्गस्य चेरुः परिभवोपमे ॥
Metre: अनुष्टुप्
भ्रेमुः शिलोच्चयांस्तुङ्गानुत्तेरुरतरान्नदान् ।आशंसवो लवं शत्रोः सीतायाश्च विनिश्चयम् ॥
Metre: अनुष्टुप्
आदरेण गमं चक्रुर्विषमेस्वप्य-सङ्घसाः । व्याप्नुवन्तो दिशोऽन्यादान्कुर्वन्तः स-व्यधान्हरीन् ॥
Metre: अनुष्टुप्
संचेरुः स-हसाः केचिद-स्वनाः केचिदाटिषुः । संयाम-वन्तो यति-वन्निगदानपरेऽमुचन् ॥
Metre: अनुष्टुप्
अथ क्लमाद-निःक्वाणा नराः क्षीण-पणा इव ।अ-मदाः सेदुरेकस्मिन्नितम्बे निखिला गिरेः ॥
Metre: अनुष्टुप्
ततः स-संमदास्तत्र निरैक्षन्त पतत्रिणः । गुहा-द्वारेण निर्यातः समजेन पशूनिव ॥
Metre: अनुष्टुप्
वीनामुपसरं दृष्ट्वा तेऽन्योन्यापहवा गुहाम् । प्राविशन्नाहव-प्रज्ञा आहावमुपलिप्सवः ॥
Metre: अनुष्टुप्