(प्रवासे प्रतिश्रुत्यादानादयः)
अथ प्रवासेऽपि प्रतिश्रुत्यादानं विविधं; यथा—(मवीच. ५.२८)
प्रिये! हाहा क्वासि प्रकिर मधुरां वाचमधुना पराभूतैरित्थं विलपनविनोदोऽप्यसुलभः।
अनिन्द्यः पौलस्त्यो व्रजतु परिवादो मयि जरां यतो रूढे वैरे बहुगुणमनेन प्रतिकृतम्॥ २४॥
कृतकरुचि/दितैर्बाष्पाम्भोभिः सदैन्यविलोकितै— र्वनमसि गता यस्य प्रीत्या तथाऽपि धृताऽम्बया।
नवजलधरश्यामाः पश्यन् दिशो भवतीं विना कठिनहृदयो जीवत्येव प्रिये! स तव प्रियः॥ २५॥
तत्रैव विसंवादनमविरुद्धं; यथा—(सूमु. २४)
तन्वङ्ग्यास्त्वमिति प्रसादविशदं, नास्तीति खेदालसं चक्षुर्द्वारपथावतारिणि जने व्यापारयन्त्या मुहुः।
हर्षार्तिप्रभवाः प्रतिक्षणभवस्वेदाम्बुदाहज्वरे बाष्पाम्भःकणिकाः पयोधरतटे पुष्यन्ति शुष्यन्ति च॥ २६॥