पुरो वा पश्चाद् वा तदिदमविपर्यासितरसं रहस्यं साधूनामनुपधि विशुद्धं विजयते॥ ५६॥
असन्तो नाभ्यर्थ्याः, सुहृदपि न याच्यस्तनुधनः प्रिया वृत्तिर्न्याय्या, मलिनमसुभङ्गेऽप्यसुकरम्।
विपद्युच्चैः स्थेयं, पदमनुविधेयं च महतां सतां केनोद्दिष्टं विषममसिधाराव्रतमिदम्॥ ५७॥
१०. परगुणेष्वमात्सर्यं यथा—
रथस्थमालोक्य रथाङ्गपाणिं स्थाने स्थिता श्रीरिति सोऽभ्यनन्दत्।
वैराणि कार्योपनिबन्धनानि निर्मत्सरा एव गुणेषु सन्तः॥ ५८॥
. . (यथा वा)—(मवीच. १.३३)
यद् विद्वानपि तादृशोऽप्यभिजने धर्म्यात् पथो विच्युतः किं ब्रूमोऽत्र तदन्यदेव न वसन्त्येकत्र सर्वे गुणाः।
हेलानिर्जितषण्मुखाद् भगवतः श्रीजामदग्न्यादृते निर्विघ्नप्रतिपन्नविश्वविजयो वीरस्तु कस्तादृशः?॥ ५९॥