तथा न तापाय पयोनिधीनाम् अश्वामुखोत्थः क्षुधितः शिखावान् । निजः पतिः संप्रति वारिपोऽपि यथा हृदिस्थः स्मरतापदुःस्थः ॥
Metre: उपजातिः
यत्प्रत्युत त्वन्मृदुबाहुवल्लीस्मृतिस्रजं गुम्फति दुर्विनीता । ततो विधत्तेऽधिकमेव तापं तेन श्रिता शैत्यगुणा मृणाली ॥
Metre: उपजातिः
न्यस्तं ततस्तेन मृणालदण्डखण्डं बभासे हृदि तापभाजि । तच्चित्तमग्नैर्मदनस्य बाणैः कृतं शतच्छिद्रमिव क्षणेन ॥
Metre: उपजातिः
इति त्रिलोकीतिलकेषु तेषु मनोभुवो विक्रमकामचारः । अमोघमस्त्रं भवतीमवाप्य मदान्धतानर्गलचापलस्य ॥
Metre: उपेन्द्रवज्रा
सारोत्थधारेव सुधारसस्य स्वयंवरः श्वो भविता तवेति । संतर्पयन्ती दमयन्ति ! तेषां श्रुतिः श्रुती नाकजुषामयासीत् ॥
Metre: उपजातिः
समं सपत्नीभवदुःखतीक्ष्णैः स्वदारनासापथिकैर्मरुद्भिः । अनङ्गशौर्यानलतापदुःस्थैः अथ प्रतस्थे हरितां मरुद्भिः ॥
Metre: उपेन्द्रवज्रा
अपास्तपाथेयसुधोपयोगैः त्वच्चुम्बिनैव स्वमनोरथेन । क्षुधं च निर्वापयता तृषं च स्वादीयसाऽध्वा गमितः सुखं तैः ॥
Metre: उपजातिः
प्रिया मनोभूशरदावदाहे देवीस्त्वदर्थेन निमज्जयद्भिः । सुरेषु सारैः क्रियतेऽधुना तैः पादार्पणानुग्रहभूरियं भूः ॥
Metre: उपजातिः
अलंकृतासन्नमहीविभागैः अयं जनस्तैरमरैर्भवत्याम् । अवापितो जङ्गमलैखलक्ष्मीं निक्षिप्य संदेशमयाक्षराणि ॥
Metre: उपजातिः
एकैकमेते परिरभ्य पीनस्तनोपपीडं त्वयि संदिशन्ति । त्वं मूर्च्छतां नः स्मरभिल्लशल्यैः मुदे विशल्यौषधिवल्लिरेधि ॥
Metre: उपजातिः