अनेन सार्धं तव यौवनेन कोटिं परामच्छिदुरोऽध्यरोहत् । प्रेमापि तन्वि ! त्वयि वासवस्य गुणोऽपि चापे सुमनः शरस्य ॥
Metre: उपजातिः
प्राचीं प्रयाते विरहादयं ते तापाच्च रूपाच्च शशाङ्कशङ्की । परापराधैर्निदधाति भानौ रुषारुणं लोचनवृन्दमिन्द्रः ॥
Metre: उपजातिः
त्रिनेत्रमात्रेण रुषा कृतं यत्तदेव योऽद्यापि न संवृणोति । न वेद रुष्टेऽद्य सहस्रनेत्रे गन्ता स कामः खलु कामवस्थाम् ॥
Metre: उपजातिः
पिकस्य वाङ्मात्रकृताद्व्यलीकान्नसप्रभुर्नन्दति नन्दनेऽपि । बालस्य चूडाशशिनोऽपराधान्नाराधनं शीलति शूलिनोऽपि ॥ ।
Metre: उपजातिः
तमोमयीकृत्य दिशः परागैः स्मरेषवः शक्रदृशां दिशन्ति । कुहूगिरश्चञ्चुपुटं द्विजस्य राकारजन्यामपि सत्यवाचम् ॥
Metre: उपजातिः
शरैः प्रसूनैस्तुदतः स्मरस्य स्मर्तुं स किं नाशनिना करोति । अभेद्यमस्याहह वर्म न स्यात् अनङ्गता चेद्गिरिशप्रसादः ॥
Metre: उपजातिः
धृताधृतेस्तस्य भवद्वियोगात् अन्यान्यशय्यारचनाय लूनैः । अप्यन्यदारिद्र्यहराः प्रवालैः जाता दरिद्रास्तरवोऽमराणाम् ॥
Metre: उपजातिः
रवैर्गुणास्फालभवैः स्मरस्य स्वर्णाथकर्णौ बधिरावभूताम् । गुरोः श्रृणोति स्मरमोहनिद्राप्रबोधदक्षाणि किमक्षराणि ॥
Metre: उपजातिः
अनङ्गतापप्रशमाय तस्य कदर्थ्यमाना मुहुरामृणालम् । मधौ मधौ नाकनदीनलिन्यो वरं वहन्तां शिशिरेऽनुरागम् ॥
Metre: उपेन्द्रवज्रा
दमस्वसः ! सेयमुपैति तृष्णा हरेर्जगत्यग्रिमलेख्यलक्ष्मीम् । दृशां यदब्धिस्तव नाम दृष्टित्रिभागलोभार्तिमसौ बिभर्ति ॥
Metre: उपेन्द्रवज्रा