अथाद्भुतेनास्तनिमेषमुद्रम् उन्निद्रलोमानममुं युवानम् । दृशा पपुस्ताः सुदृशः समस्ताः सुता च भीमस्य महीमघोनः ॥
Metre: उपजातिः
कियच्चिरं दैवतभाषितानि निह्नोतुमेनं प्रभवन्तु नाम । पलालजालैः पिहितः स्वयं हि प्रकाशमासादयतीक्षुडिम्भः ॥
Metre: उपजातिः
अपाङ्गमप्याय दृशोर्न रश्मिः नलस्य भैमीमभिलष्य यावत् । स्मराशुगः सुभ्रुवि तावदस्यां प्रत्यङ्गमापुङ्खशिखं ममज्ज ॥
Metre: उपजातिः
यदक्रमं विक्रमशक्तिसाम्याद् उपाचरद्द्वावपि पञ्चबाणः । कथं न वैमत्यममुष्य चक्रे शरैरनर्धार्धविभागभाग्मिः ॥
Metre: उपेन्द्रवज्रा
तस्मिन्नलोऽसाविति सान्वरज्यत्क्षणं क्षणं क्वेह स इत्युदास्त । पुनः स्म तस्यां वलतेऽस्य चित्तं दूत्यादनेनाथ पुनर्न्यवर्ति ॥
Metre: उपजातिः
कयाचिदालोक्य नलं ललज्जे कयापि तद्भासि हृदा ममज्जे । तं कापि मेने स्मरमेव कन्या भेजे मनोभूवशभूयमन्या ॥
Metre: उपजातिः
कस्त्वं कुतो वेति न जातु शेकुः तं प्रष्टुमप्यप्रतिभातिभारात् । उत्तस्थुरभ्युत्थितिवाञ्छयेव निजासनान्नैकरसाः कृशाङ्ग्यः ॥
Metre: उपजातिः
स्वाच्छन्द्यमानन्दपरंपराणां भैमी तमालोक्य किमप्यवाप । महारयं निर्झरिणीव वाराम् आसाद्य धाराधरकेलिकालम् ॥
Metre: उपजातिः
तत्रैव मग्ना यदपश्यदग्रे नास्या दृगस्याङ्गमयास्यदन्यत् । नादास्यदस्यै यदि बुद्धिधारां विच्छिद्य विच्छिद्य चिरान्निमेषः ॥
Metre: इन्द्रवज्रा
दृशापि सालिङ्गितमङ्गमस्य जग्राह नाग्रावगताङ्गहर्षैः । अङ्गान्तरेऽनन्तरमीक्षिते तु निवृत्य सस्मार न पूर्वदृष्टम् ॥
Metre: उपजातिः