स्वात्मापि शीलेन तृणं विधेयं देया विहायासनभूर्निजापि । आनन्दबाष्पैरपि कल्प्यमम्भः पृच्छा विधेया मधुभिर्वचोभिः ॥
Metre: इन्द्रवज्रा
पदोपहारेऽनुपनम्रतापि संभाव्यतेऽपां त्वरयापराधः । तत्कर्तुमर्हाञ्जलिसञ्जनेन स्वसंभृतिः प्राञ्जलतापि तावत् ॥
Metre: उपजातिः
पुरा परित्यज्य मयात्यसर्जि स्वमासनं तत्किमिति क्षणं न । अनर्हमप्येतदलंक्रियेत प्रयातुमीहा यदि चान्यतोऽपि ॥
Metre: उपेन्द्रवज्रा
निवेद्यतां हन्त समापयन्तौ शिरीषकोषभ्रदिमाभिमानम् । पादौ कियद्दूरमिमौ प्रयासे निधित्सते तुच्छदयं मनस्ते ॥
Metre: उपजातिः
अनायि देशः कतमस्त्वयाद्य वसन्तमुक्तस्य दशां वनस्य । त्वदाप्तसंकेततया कृतार्था श्रव्यापि नानेन जनेन संज्ञा ॥
Metre: उपजातिः
तीर्णः किमर्णोनिधिरेव नैष सुरक्षितेऽभूदिह यत्प्रवेशः । फलं किमेतस्य तु साहसस्य न तावदद्यापि विनिश्चिनोमि ॥
Metre: उपजातिः
तव प्रवेशे सुकृतानि हेतुः मन्ये मदक्ष्णोरपि तावदत्र । न लक्षितो रक्षिभटैर्यदाभ्यां पीतोऽसि तन्वा जितपुष्पधन्वा ॥
Metre: उपजातिः
यथाकृतिः काचन ते यथा वा दौवारिकान्धंकरणी च शक्तिः । रुच्यो रुचीभिर्जितकाञ्चनीभिः तथासि पीयूषभुजां सनाभिः ॥
Metre: उपजातिः
न मन्मथस्त्वं स हि नास्तिमूर्तिः न चाश्विनेयः स हि नाद्वितीयः । चिह्नैः किमन्यैरथवा तवेयं श्रीरेव ताभ्यामधिको विशेषः ॥
Metre: उपजातिः
आलोकतृप्तीकृतलोक ! यस्त्वाम् असूत पीयूषमयूखमेनम् । कः स्पर्धितुं धावति साधु सार्धम् उदन्वता नन्वयमन्ववायः ॥
Metre: उपजातिः