इयच्चिरस्यावदधन्ति मत्पथे किमिन्द्रनेत्राण्यशनिर्न निर्ममौ । धिगस्तु मां सत्वरकार्यमन्थरं स्थितः परप्रेष्यगुणोऽपि यत्र न ॥
Metre: वंशस्थम्
इदं निगद्य क्षितिभर्तरि स्थिते तयाभ्यधायि स्वगतं विदग्धया । अधिस्त्रि तं दूतयतां भुवः स्मरं मनो दधत्या नयनैपुणव्यये ॥
Metre: वंशस्थम्
जलाधिपस्त्वामदिशन्मयि ध्रुवं परेतराजः प्रजिधाय स स्फुटम् । मरुत्वतैव प्रहितोऽसि निश्चितं नियोजितश्चोर्ध्वमुखेन तेजसा ॥
Metre: वंशस्थम्
अथ प्रकाशं निभृतस्मिता सती सतीकुलस्याभरणं किमप्यसौ । पुनस्तदाभाषणविभ्रमोन्मुखं मुखं विदर्भाधिपसंभवा दधौ ॥
Metre: वंशस्थम्
वृथापरीहास इति प्रगल्भता न नेति च त्वादृशि वाग्विगर्हणा । भवत्यवज्ञा च भवत्यनुत्तरात् अतः प्रदित्सुः प्रतिवाचमस्मि ते ॥
Metre: वंशस्थम्
कथं नु तेषां कृपयापि वागसावसावि मानुष्यकलाञ्छने जने । स्वभावभक्तिप्रवणं प्रतीश्वराः कया न वाचा मुदमुद्गिरन्ति वा ॥
Metre: वंशस्थम्
अहो महेन्द्रस्य कथं मयौचिती सुराङ्गनासंगमशोभिताभृतः । ह्रदस्य हंसावलिमांसलश्रियो बलाकयेव प्रबला विडम्बना ॥
Metre: वंशस्थम्
पुरः सुरीणां भण केव मानवी न यत्र तास्तत्र तु शोभिकापि सा । अकाञ्चनेऽकिंचन नायिकाङ्गके किमारकूटाभरणेन न श्रियः ॥
Metre: वंशस्थम्
यथा तथा नाम गिरः किरन्तु ते श्रुती पुनर्मे बधिरे तदक्षरे । पृषत्किशारी कुरुतामसंगतां कथं मनोवृत्तिमपि द्विपाधिपे ॥
Metre: वंशस्थम्
अदो निगद्यैव नतास्यया तया श्रुतौ लगित्वाभिहितालिरालपत् । प्रविश्य यन्मे हृदयं ह्रियाह तद्विनिर्यदाकर्णय मन्मुखाध्वना ॥
Metre: वंशस्थम्