इति प्रतीत्यैव मयावधीरिते तवापि निर्बन्धरसो न शोभते । हरित्पतीनां प्रतिवाचिकं प्रति श्रमो गिरां ते घटते हि संप्रति ॥
Metre: वंशस्थम्
तथापि निर्बन्धति ! तेऽथवा स्पृहाम् इहानुरुन्धे मितया न किं गिरा । हिमांशुवंशस्य करीरमेव मां निशम्य किं नासि फलेग्रहिग्रहा ॥
Metre: वंशस्थम्
महाजनावारपरम्परेदृशी स्वनाम नामाददते न साधवः । अतोऽभिधातुं न तदुत्सहे पुनः जनः किलाचारमुचं विगायति ॥
Metre: वंशस्थम्
अदोऽयमालप्य शिखीव शारदो बभूव तूष्णीमहितापकारकः । अथास्यरागस्य दधा पदे पदे वचांसि हंसीव विदर्भजाददे ॥
Metre: वंशस्थम्
सुधांशुवंशाभरणं भवानिति श्रुतेऽपि नापैति विशेषसंशयः । कियत्सु मौनं वितता कियत्सु वाङ्महत्यहो वञ्चनचातुरी तव ॥
Metre: वंशस्थम्
मयापि देयं प्रतिवाचिकं न ते स्वनाम मत्कर्णसुधामकुर्वते । परेण पुंसा हि ममापि संकथा कुलाबलाचारसहासनासहा ॥
Metre: वंशस्थम्
हृदाभिनन्द्य प्रतिबन्द्यनुत्तरः प्रियागिरः सस्मितमाह स स्म ताम् । वदामि वामाक्षि ! परेषु मा क्षिप स्वमीदृशं माक्षिकमाक्षिपद्वचः ॥
Metre: वंशस्थम्
करोषि नेमं फलिनं मम श्रमं दिशोऽनुगृह्णासि न कंचन प्रभुम् । त्वमित्थमर्हासि सुरानुपासितुं रसामृतस्नानपवित्रया गिरा ॥
Metre: वंशस्थम्
सुरेषु संदेशयसीदृशीं बहुं रसस्रवेण स्तिमितां न भारतीम् । मदर्पिता दर्पकतापितेषु या प्रयाति दावार्दितदाववृष्टिताम् ॥
Metre: वंशस्थम्
यथा यथेह त्वदुपेक्षयानया निमेषमप्येष जनो विलम्बते । रुषा शरव्यीकरणे दिवौकसां तथा तथाद्य त्वरते रतेः पतिः ॥
Metre: वंशस्थम्