इतीयमक्षिभ्रुवविभ्रमेङ्गितस्फुटामनिच्छां विवरीतुमुत्सुका । तदुक्तिमात्रश्रवणेच्छयाऽशृणोद्दिगीशसंदेशगिरं न गौरवात् ॥
Metre: वंशस्थम्
तदर्पितामश्रुतवद्विधाय तां दिगीशसंदेशमयीं सरस्वतीम् । इदं तमुर्वीतलशीतलद्युतिं जगाद वैदर्भनरेन्द्रनन्दिनी ॥
Metre: वंशस्थम्
मयाङ्ग ! पृष्टः कुलनामनी भवान् अमू विमुच्यैव किमन्यदुक्तवान् । न मह्यमत्रोत्तरधारयस्य किं ह्रियेऽपि सेयं भवतोऽधमर्णता ॥
Metre: वंशस्थम्
अदृश्यमाना क्वचिदीक्षिता क्वचिन्ममानुयोगे भवतः सरस्वती । क्वचित्प्रकाशां क्वचिदस्फुटार्णसं सरस्वतीं जेतुमनाः सरस्वतीम् ॥
Metre: वंशस्थम्
गिरः श्रुता एव तव श्रवः सुधाः श्लथा भवन्नाम्नि तु न श्रुतिस्पृहा । पिपासुता शान्तिमुपैति वारिजा न जातु दुग्धान्मधुनोऽधिकादपि ॥
Metre: वंशस्थम्
बिभर्ति वंशः कतमस्तमोपहं भवादृशं नायकरत्नमीदृशम् । तमन्यसामान्यधियावमानितं त्वया महान्तं बहु मन्तुमुत्सहे ॥
Metre: वंशस्थम्
इतीरयित्वा विरतां स तां पुनः गिरानुजग्राहतरां नराधिपः । विरुत्य विश्रान्तवतीं तपात्यये घनाघनश्चातकमण्डलीमिव ॥
Metre: वंशस्थम्
अये ! ममोदासितमेव जिह्वया द्वयेऽपि तस्मिन्ननतिप्रयोजने । गरौ गिरः पल्लवनार्थलाघवे मितं च सारं च वचो हि वाग्मिता ॥
Metre: वंशस्थम्
वृथा कथेयं मयि वर्णपद्धतिः कयानुपूर्व्या समकेति केति च । क्षमे समक्षव्यवहारमावयोः पदे विधातुं खलु युष्मदस्मदी ॥
Metre: वंशस्थम्
यदि स्वभावान्मम नोज्ज्वलं कुलं ततस्तदुद्भावनमौचिती कुतः । अथावदातं तदहो विडम्बना तथा कथा प्रेष्यतयोपसेदुषः ॥
Metre: वंशस्थम्