आस्तामनङ्गीकरणाद्भवेन दृश्यः स्मरो नेति पुराणवाणी । तवैव देहं श्रितया श्रियेति नवस्तु वस्तु प्रतिभाति वादः ॥
Metre: उपजातिः
त्वया जगत्युच्चितकान्तिसारे यदिन्दुनाशीलि शिलोञ्छवृत्तिः । आरोपि तन्माणवकोऽपि मौलौ स यज्वराज्येऽपि महेश्वरेण ॥
Metre: उपजातिः
आदेहदाहं कुसुमायुधस्य विधाय सौन्दर्यकथादरिद्रम् । त्वदङ्गशिल्पात्पुनरीश्वरेण चिरेण जाने जगदन्वकम्पि ॥
Metre: उपजातिः
मही कृतार्था यदि मानवोऽसि जितं दिवा यद्यमरेषु कोऽपि । कुलं त्वयालंकृतमौरगं चेन्नाधोऽपि कस्योपरि नागलोकः ॥
Metre: उपजातिः
सेयं न धत्तेऽनुपपत्तिमुच्चैः मच्चित्तवृत्तिस्त्वयि चिन्त्यमाने । ममौ स भद्रं चुलुके समुद्रः त्वयात्तगाम्भीर्यमहत्त्वमुद्रः ॥
Metre: उपजातिः
संसारसिन्धावनुबिम्बमत्र जागर्ति जाने तव वैरसेनिः । बिम्बानुबिम्बौ हि विहाय धातुः न जातु दृष्टातिसरूपसृष्टिः ॥
Metre: उपजातिः
इयत्कृतं केन महीजगत्याम् अहो महीयः सुकृतं जनेन । पादौ यमुद्दिश्य तवापि पद्यारजःसु पद्मस्रजमारभेते ॥
Metre: उपजातिः
ब्रवीति मे किं किमियं न जाने संदेहदोलामवलम्ब्य संवित् । कस्यापि धन्यस्य गृहातिथिस्त्वमलीकसंभावनयाथवालम् ॥
Metre: उपजातिः
प्राप्त्यैव तावत्तव रूपसृष्टिं निपीय दृष्टिर्जनुषः फलं मे । अपि श्रुती नामृतमाद्रियेतां तयोः प्रसादीकुरुषे गिरं चेत् ॥
Metre: उपजातिः
इत्थं मधूत्थं रसमुद्गिरन्ती तदोष्ठबन्धूकधनुर्विसृष्टा । कर्णात्प्रसूनाशुगपञ्चबाणी वाणीमिषेणास्य मनो विवेशः ॥
Metre: उपजातिः