पतिंवरायाः कुलजं वरस्य वा यमः कमप्याचरितातिथिं यदि । कथं न गन्ता विफलीभविष्णुतां स्वयंवरः साध्वि ! समृद्धिमानपि ? ॥
Metre: वंशस्थम्
अपः प्रति स्वामितयाऽपरः सुरः स ता निषेधेद्यदि नैषधक्रुधा । नलाय लोभात्ततपाणयेऽपि ते पिता कथं त्वां वद संप्रदास्यते ॥
Metre: वंशस्थम्
इदं महत्तेऽभिहितं हितं मया विहाय मोहं दमयन्ति ! चिन्तय । सुरेषु विघ्नैकपरेषु को नरः करस्थमप्यर्थमवाप्तुमीश्वरः ? ॥
Metre: वंशस्थम्
इमा गिरस्तस्य विचिन्त्य चेतसा तथेति संप्रत्ययमाससाद सा । निवारितावग्रहनीरनिर्झरे नभोनभस्यत्वमलम्भयद्दृशौ ॥
Metre: वंशस्थम्
स्फुटोत्पलाभ्यामलिदंपतीव तद्विलोचनाभ्यां कुचकुङ्मलाशया । निपत्य बिन्दू हृदि कज्जलाविलौ मणीव नीलौ तरलौ विरेजतुः ॥
Metre: वंशस्थम्
धुतापतत्पुष्पशिलीमुखाशुगैः शुचेस्तदासीत्सरसी रसस्य सा । रयाय बद्धादरयाश्रुधारया सनालनीलोत्पललीललोचना ॥
Metre: वंशस्थम्
अथोद्भ्रमन्ती रुदती गतक्षमा ससंभ्रमा लुप्तरतिः स्खलन्मतिः । व्यधात्प्रियप्राप्तिविधातनिश्चयान्मृदूनि दूना परिदेवतानि सा ॥
Metre: वंशस्थम्
त्वरस्व पञ्चेषुहुताशनात्मनः तनुष्व मद्भस्ममयं यशश्चयम् । विधे ! परेहाफलभक्षणव्रती पताद्य तृष्यन्नसुभिर्ममाफलैः ॥
Metre: वंशस्थम्
भृशं वियोगानलतप्यमान ! किं विलीयसे न त्वमयोमयं यदि । स्मरेषुभिर्भेद्य ! न वज्रमप्यसि ब्रवीषि न स्वान्त ! कथं न दीर्यसे ॥
Metre: वंशस्थम्
विलम्बसे जीवित ! किं द्रव द्रुतं ज्वलत्यदस्ते हृदयं निकेतनम् । जहासि नाद्यापि मृषा सुखासिकाम् अपूर्वमालस्यमिदं तवेदृशम् ॥
Metre: वंशस्थम्