१. रञ्जकाभावे = रञ्जकाद्युपजनाभावे राघवः। २. कर्तृव्यापारो प्रत्ययार्थं इति राघवः। तदुपरक्तत्वेन सर्वदोपलम्भात्। न चैतावतासौ नास्ति, नास्तितायां हि तस्याः किं करोतीति अनवगतविशेष्य(ष)व्यापारप्रश्ने पचति पठतीत्युत्तरमनुत्तरमेव भवति। किंच—
औदासीन्यदशायां तु पुमान् येन प्रवर्तते।
स यत्नो यागहोमादौ भावनेत्यभिधीयते॥ ७१॥
सा च सामान्यरूपापि न गोत्वादिवत् क्रियात्ववद् वा सिद्धतयावभासते, येन विधेया न भवति। यद्येवम्—
क्रियाविशेष एवासौ व्यापारो व्यापारो ज्ञातुरान्तरः।
स्पन्दात्मकबहिर्भूतक्रियाक्षणविलक्षणः॥ ७२॥
क्रियायाश्च पदार्थत्वमिष्यत एव। ननु च पदार्थत्वेऽपि क्रियाया वाक्यार्थत्वमेव न्याय्यम्।
यतः पदार्था वाक्यार्थभावमायान्ति संहताः।
अपेक्षानुगुणान्योन्यव्यतिषङ्गविशेषिताः॥ ७३॥