इह सा व्यलिपद्गन्धैः स्नान्तीहाऽभ्यषिचज्जलैः ।इहाऽहं द्रष्टुमाह्वं तां" स्मरन्नेवं मुमोह सः ॥
Metre: अनुष्टुप्
तस्याऽलिपत शोकाऽग्निः स्वान्तं काष्ठमिव ज्वलन् ।अलिप्तेवाऽनिलः शीतो वने तं न त्वजिह्लदत् ॥
Metre: अनुष्टुप्
स्नानभ्यषिचताऽम्भोऽसौ रुदन्दयितया विना । तथाऽभ्यषिक्त वारीणि पितृभ्यः शोक-मूर्च्छितः ॥
Metre: अनुष्टुप्
तथाऽऽ र्तोऽपि क्रियां धर्म्यां स काले नाऽमुचत्क्वचित् । महतां हि क्रिया नित्या छिद्रे नैवाऽवसीदति ॥
Metre: अनुष्टुप्
आह्वास्त स मुहुः शूरान्मुहुराह्वत राक्षसान् । "एत सीताद्रुहः संख्ये प्रत्यर्तयत राघवम् ॥
Metre: अनुष्टुप्
स्व-पोषमपुषद्युष्मान्या पक्षि-मृग-शावकाः ! ।अद्युतच्चेन्दुना सार्धं तां प्रब्रूत गता यतः।" ॥
Metre: अनुष्टुप्
गिरिमन्वसृपद्रामो लिप्सुर्जनक-संभवाम् । तस्मिन्नायोधनं वृत्तं लक्ष्मणायाऽशिषन्महत् ॥
Metre: अनुष्टुप्
"सीतां जिघांसू सौमित्रे ! राक्षसावारतां ध्रुवम् ।इदं शोणितमभ्यग्रं सप्रहारेऽच्युतत्तयोः ॥
Metre: अनुष्टुप्
इदं कवचमच्योतीत्साऽश्वोऽयं चूर्णीतो रथः ।एह्यमुं गिरिमन्वेष्टुमवगाहावहे द्रुतम् ॥
Metre: अनुष्टुप्
मन्युर्मन्ये ममाऽस्तम्भीद्विषादोऽस्तभदुद्यतिम् ।अजारीदिव च प्रज्ञा बलं शोकात्तथाजरत् ॥
Metre: अनुष्टुप्