आः कष्टं बत ही-चित्रं हूं मातर्दैवतानि धिक् । हा पितः ! क्वाऽसि हे सु-भ्रु !" बह्वेवं विललाप सः ॥
Metre: अनुष्टुप्
इहाऽऽसिष्ठाऽशयिष्टेह सा स-खेलमितोऽगमत् ।अग्लासीत्संस्मरन्नित्थं मैथिल्या भरताऽग्रजः ॥
Metre: अनुष्टुप्
"इदं नक्तं-तनं दाम पौष्पमेतद्दिवा-तनम् । शुचेवोद्बध्य शाखायां प्रग्लायति तया विना ॥
Metre: अनुष्टुप्
ऐक्षिष्महि मुहुः सुप्तां यां मृताऽऽशङ्कया वयम् ।अ-काले दुर्मरमहो यज्जीवामस्तया विना ॥
Metre: अनुष्टुप्
अ-क्षेमः परिहासोऽयं। परीक्षां मा कृथा मम । मत्तो माऽन्तिर्धथाः सीते ! मा रंस्था जीवितेन नः ॥
Metre: अनुष्टुप्
अहं न्यवधिषं भीमं राक्षसं क्रूर विक्रमम् । मा घुक्षः पत्युरात्मानं मा न श्लिक्षः प्रियं प्रिये ॥
Metre: अनुष्टुप्
मा स्म द्राक्षीर्मृषा दोषं भक्तं मा मातिचिक्लिशः । शैलं न्यशिश्रियद्वामा नदीं नु प्रत्यदुद्रुवत् ॥
Metre: अनुष्टुप्
ऐ वाचं देहि। धैर्यं नस्तव हेतोरसुस्रुवत्। । त्वं नो मतिमिवाऽघासीर्नष्टा प्राणानिवाऽदधः ॥
Metre: अनुष्टुप्
रुदतोऽशिश्वयच्चक्षु रास्यं हेतोस्तवाऽश्वयीत् । म्रियेऽहं मां निरास्थश्चेन्मा न वोचश्चिकीर्षितम् ॥
Metre: अनुष्टुप्
लक्ष्मणाऽऽचक्ष्व यद्याख्यत्सा किञ्चित्कोप-कारणम् । दोषे प्रतिसमाधान मज्ञाते क्रियतां कथम् ॥
Metre: अनुष्टुप्