स्थायं स्थायं क्वचिद्यान्तं क्रान्त्वा क्रान्त्वा स्थितं क्वचित् । वीक्षमाणो मृगं रामश्चित्र-वृत्तिं विसिष्मिये ॥
Metre: अनुष्टुप्
चिरं क्लिशित्वा मर्मा-विद्रामो विलुभित-प्लवम् । शब्दायमानमव्यात्सीत्भय-दं क्षणदा-चरम् ॥
Metre: अनुष्टुप्
श्रुत्वा विस्फूर्जथु-प्रख्यं निनादं परिदेविनी । मत्वा कष्ट-श्रितं रामं सौमित्रिं गन्तुमैजिहत् ॥
Metre: अनुष्टुप्
"एष प्रावृषि-जाऽम्भो-द- नादी भ्राता विरौति ते । ज्ञातेयं कुरु सौमित्रे ! भयात्त्रायस्व राघवम्।" ॥
Metre: अनुष्टुप्
"राम-संघुषितं नैतन्मृगस्यैव विवञ्चिषोः । राम-स्वनित-सङ्काशः स्वान्"इत्यवदत्स ताम् ॥
Metre: अनुष्टुप्
"आप्यान-स्कन्ध-कण्ठांऽसं रुषितं सहितुं रणे । प्रोर्णुवन्तं दिशो बाणैः काकुत्स्थं भीरु ! कः क्षमः ॥
Metre: अनुष्टुप्
देहं बिभ्नक्षुर-स्त्राऽग्नौ मृगः प्राणैर्दिदेविषन् । ज्या-घृष्ट-कठिनाऽङ्गुष्ठं राममायान्मुमूर्षया ॥
Metre: अनुष्टुप्
शत्रून्भीषयमाणं तं रामं विस्मापयेत कः । मा स्म भैषीस्त्वयाऽद्यैव कृताऽर्थो द्रक्ष्यते पतिः" ॥
Metre: अनुष्टुप्
"यायास्त्वमिति कामो मे गन्तुमुत्सहसे न च ।इच्छुः कामयितुं त्वं माम्"इत्यसौ जगदे तया ॥
Metre: अनुष्टुप्
मृषोद्यं प्रवदन्तीं तां सत्य-वद्यो रघूत्तमः । निरगात् "शत्रु-हस्तं त्वं यास्यसी"ति शपन्वशी ॥
Metre: अनुष्टुप्