अपेक्षितक्रियं द्विधा, व्यवहितमव्यवहितं च। तयोः
व्यवहितं यथा— ग्रामादागच्छति, ब्राह्मणाय ददाति, पर्यङ्के शेत इति।
अव्यवहितं यथा— कटं करोति, दात्रेण लुनाति, देवदत्तेनास्यत इति।
अनुषक्तक्रियं द्विधा, तुल्याधिकरणमतुल्याधिकरणं च। तयोः
तुल्याधिकरणं यथा— शुक्लीभवति, उन्मनी स्यात्, भस्मसात् संपद्यत इति।
अतुल्याधिकरणं यथा— पटपटाकरोति, देवत्रागच्छति, मनुष्यत्रावसति इति।
(३) अभिन्नक्रियं त्रिधा, तिङभिधेयं, कृदभिधेयं तद्धिताभिधेयं च। तत्र—
तिङभिधेयं द्विधा कर्तृरूपं कर्मरूपं च। तयोः
कर्तृरूपं यथा— पचति देवदत्तः, दुग्धे गौः, चोरस्य रूजति रोग इति।
कर्मरूपं यथा— पच्यते ओदनः, भिद्यते कुसूलः, उष्ट्रासिका आस्यन्त इति।