यः सायमतिथिं प्राप्तं यथा-शक्ति न पूजयेत् । तस्यासौ दुष्कृतं दत्त्वा सुकृतं चापकर्षति ॥
Metre: अनुष्टुप्
मा चास्मै त्वं कृथा द्वैषं बद्धानेनेति मत्-प्रिया । स्व-कृतैरेव बद्धाहं प्राक्तनैः कर्म-बन्धनैः ॥
Metre: अनुष्टुप्
दारिद्र्य-रोग-दुःखानि बन्धन-व्यसनानि च । आत्मापराध-वृक्षस्य फलान्येतानि देहिनाम् ॥
Metre: अनुष्टुप्
तस्मात्त्वं द्वेषमुत्सृज्य मद्-बन्धन-समुद्भवम् । धर्मे मनः समाधाय पूजयैनं यथा-विधि ॥
Metre: अनुष्टुप्
तस्यास्तद्-वचनं श्रुत्वा धर्म-युक्ति-समन्वितम् । उपगम्य ततोऽधृष्टः कपोतः प्राह लुब्धकम् ॥
Metre: अनुष्टुप्
भद्र सुस्वागतं तेऽस्तु ब्रूहि किं करवाणि ते । सन्तापश्च न कर्तव्यः स्व-गृहे वर्तते भवान् ॥
Metre: अनुष्टुप्
तस्य तद्-वचनं श्रुत्वा प्रत्युवाच विहङ्गमम् । कपोत खलु शीतं मे हिम-त्राणं विधीयताम् ॥
Metre: अनुष्टुप्
स गत्वाङ्गारकं नीत्वा पातयामास पावकम् । ततः शुष्केषु पर्णेषु तमाशु समदीपयत् ॥
Metre: अनुष्टुप्
सुसन्दीप्तं ततः कृत्वा तमाह शरणागतम् । प्रतापयस्व विश्रब्धं स्व-गात्राण्यत्र निर्भयः ॥
Metre: अनुष्टुप्
उद्गतेन च जीवामो वयं सर्वे वनौकसः । न चास्ति विभवः कश्चिन्नाशये येन ते क्षुधम् ॥
Metre: अनुष्टुप्