सहस्रं भरते कश्चिच्छतमन्यो दशापरः । मम त्वकृत-पुण्यस्य क्षुद्रस्यात्मापि दुर्भरः ॥
Metre: अनुष्टुप्
एकस्याप्यतिथेरन्नं यः प्रदातुं न शक्तिमान् । तस्यानेक-परिक्लेशे गृहे किं वसतः फलम् ॥
Metre: अनुष्टुप्
तत्तथा साधयाम्येतच्छरीरं दुःख-जीवितम् । यथा भूयो न वक्ष्यामि नास्तीत्यर्थि-समागमे ॥
Metre: अनुष्टुप्
स निनिन्दि किलात्मानं न तु तं लुब्धकं पुनः । उवाच तर्पयिष्ये त्वां मुहूर्तं प्रतिपालय ॥
Metre: अनुष्टुप्
एवमुक्त्वा स धर्मात्मा प्रहृष्टेनान्तरात्मना । तमग्निं सम्परिक्रम्य प्रविवेश स्व-वेश्मवत् ॥
Metre: अनुष्टुप्
ततस्तं लुब्धको दृष्ट्वा कृपया पीडितो भृशम् । कपोतमग्नौ पतितं वाक्यमेतदभाषत ॥
Metre: अनुष्टुप्
यः करोति नरः पापं न तस्यात्मा ध्रुवं प्रियः । आत्मना हि कृतं पापमात्मनैव हि भुज्यते ॥
Metre: अनुष्टुप्
सोऽहं पाप-मतिश्चैव पाप-कर्म-रतः सदा । पतिष्यामि महा-घोरे नरके नात्र संशयः ॥
Metre: अनुष्टुप्
नूनं मम नृशंसस्य प्रत्यादर्शः सुदर्शितः । प्रयच्छता स्व-मांसानि कपोतेन महात्मना ॥
Metre: अनुष्टुप्
अद्य-प्रभृति देहं स्वं सर्व-भोग-विवर्जितम् । तोयं स्वल्पं यथा ग्रीष्मः शोषयिष्याम्यहं पुनः ॥
Metre: अनुष्टुप्