(सङ्गमसुखसमाभ्यधिकमनोरथा भवन्ति सन्देशाः॥)
असङ्कल्पितमप्यर्थमुत्सृष्टमपि कारणात्।
पुनरावर्तयत्येव दूती वचनकौशलात्॥ ९२b॥
दूतीसखीनायिकाव्याख्यानप्रपञ्चः। तत्र—
१. दूतीसख्याः यथा—(मामा. २.८/९) 'श्रूयतामस्ति, विदर्भाधिपस्य नरपतेः अमात्य' इत्यत आरभ्य 'स एष माधवो नाम' इतियावत्।
२. दूतीनायिका यथा—(मामा. ३.१०/११)
कामन्दकी— मालत्याश्चिबुकमुन्नमय्य 'शृणु विचित्रमिदं सुभगे। अस्ति तावदेकदा प्रसङ्गतः कथित एव मया माधवाभिधानः कुमारो यस्त्वमिव मामकीनस्य मनसो द्वितीयं बन्धनम्' इत्युपक्रम्य 'अहो उपन्यास अहो महत्त्वारोपणे यत्न' इति माधवस्य सम्प्रत्ययोत्पत्तिरिति यावत्।