४. अस्मिन्नेवंगते इदमेदं भविष्यतीत्याशाजननं आयतिप्रदर्शनम्। यथा—(बारा. १.३४)
सोऽयं स्वयंग्रहणदुर्ललितो दशास्यस्त्वां याचते दुहितरं पणपूर्वमेव।
सम्बन्धसन्धिममुना च सहानुभूय वंशो निमेर्जयतु यावदियं धरित्री॥ १२५॥
५. योऽहं स भवान्, यन्मम द्रव्यं तद्भवतः, स्वकृत्येषूपयुज्यतामित्यात्मोपाधानं, यथा—(कुसं. ५.५०)
कियच्चिरं श्रामयसि गौरि विद्यते ममापि पूर्वाश्रमसञ्चितं तपः।
तदर्धभागेन लभस्व काङ्क्षितं पतिं तमिच्छामि च साधु वेदितुम्॥ १२६॥
अन्यविद्वेषणम्, अन्यव्यवर्तनम्, अन्योपभोगदर्शनम् अन्यानुरागकथनम्, अन्यसौभाग्यप्रकाशनं चेति भेदः। तदुक्तम्— (कासू. ५. ४, ६४, ६५, पृ. ५६७ चौखं. सं. १९६४)
विद्वेषं ग्राहयेत् पत्यौ रमणीयानि वर्णयेत्।
चित्रान् सुरतसम्भोगानन्यासामपि दर्शयेत्॥ १२७॥