आपत्-काले तु सम्प्राप्ते यन्मित्रं मित्रमेव तत् । वृद्धि-काले तु सम्प्राप्ते दुर्जनोऽपि सुहृद्भवेत् ॥
Metre: अनुष्टुप्
तन्ममाप्यद्यास्य विषये विश्वासः समुत्पन्नो यतो नीति-विरुद्धेयं मैत्री मांसाशिभिर्वायसैः सह जलचराणाम् । अथवा साध्विदमुच्यते—
मित्रं कोऽपि न कस्यापि नितान्तं न च वैर-कृत् । दृश्यते मित्र-विध्वस्तात्कार्याद्वैरी परीक्षितः ॥
Metre: अनुष्टुप्
तत्स्वागतं भवतः । स्व-गृह-वदास्यतामत्र सरस्-तीरे । यच्च वित्त्-नाशो विदेश-वासश्च ते सञ्जातस्तत्र विषये सन्तापो न कर्तव्यः । उक्तं च—
अभ्रच्-छाया खल-प्रीतिः समुद्रान्ते च मेदिनी । अल्पेनैव विनश्यन्ति यौवनानि धनानि च ॥
Metre: अनुष्टुप्
अत एव विवेकिनो जितात्मानो धन-स्पृहां न कुर्वन्ति । उक्तं च—
सुसञ्चितैर्जीवनवत्सुरक्षितैर्निजेऽपि देहे न वियोजितैः क्वचित् । पुंसो यमान्तं व्रजतोऽपि निष्ठुरैर् एतैर्धनैः पञ्चपदी न दीयते ॥
Metre: उपजातिः
यथामिषं जले मत्स्यैर्भक्ष्यते श्वापदैर्भुवि । आकाशे पक्षिभिश्चैव तथा सर्वत्र वित्तवान् ॥
Metre: अनुष्टुप्