तेनैते नियतं दरिद्रति गृहेष्वेषामियं दृश्यते नैनामाद्रियसे त्वमिच्छसि तु तां त्वामेव सा धावति॥ २५३॥
पदादिदोषाणामनुकरणादिषु गुणत्वापत्तये दोषगुणाः। तेऽपि प्राग्वदेव त्रिविधा अपि प्रत्येकं चतुर्विंशतिधा। तत्र — पददोषेषु —
१. असाधोर्म्लिष्टम्लेच्छितादेरनुकरणे गुणत्वं, यथा—
उन्नमय्य सकचग्रहमास्यं चुम्बति प्रियतमे हठवृत्त्या।
हुंहुं मुञ्च मममेति च मन्दं जल्पितं जयति मानवतीनाम्॥ २५४॥
२. अनुकरण एवाप्रयुक्तस्य गुणत्वं, यथा—(मभा. ३.१.४८)
दिवं पत्काषिणो यान्ति येऽचीकमत भाषिणः।
पत्काषिणोऽपि नो यान्ति ये वचन्ति प्रयुञ्जते॥ २५५॥