१८. अर्थसङ्कोचः सङ्क्षेपः, यथा—
श्रूयतां धर्मसर्वस्वं श्रुत्वा चैवावधार्यताम्।
आत्मनः प्रतिकूलानि परेषां न समाचरेत्॥ २४७॥
१९. तुल्यशब्दार्थविभागः सम्मितत्वम्, यथा—
इन्दुर्मू्र्घ्नि शिवस्य शैलदुहितुर्वक्रो नखाङ्कः स्तने देयाद् वोऽभ्युदयं द्वयं तदुपमामालम्बमानं मिथः।
संवादः प्रणवेन यस्य दलता कायैकतायां तयो— रूर्ध्वद्वारविचिन्तितेन च हृदि ध्यातः स्वरूपेण च॥ २४८॥
२०. साभिप्रायोक्तिः भाविकत्वम्, यथा—
दृष्टिं हे प्रतिवेशिनि क्षणमिहाप्यस्मद्गृहे दास्यसि प्रायेणास्य शिशोः पिता न विरसाः कौपीरपः पास्यति।
एकाकिन्यपि यामि तद् वरमितः स्त्रोतस्स्तमालाकुलं नीरन्ध्राः पुनरालिखन्तु जठरच्छेदा नलग्रन्थयः॥ २४९॥
२१. अर्थादर्थान्तरावगमो गतिः, यथा—