तां पराजयमानां स प्रीते रक्ष्यां दशाऽऽननात् ।अन्तर्दधानां रक्षोभ्यो मलिनां म्लान-मूर्धजाम् ॥
Metre: अनुष्टुप्
रामादधीत-संदेशो वायोर्जातश्च्युत-स्मिताम् । प्रभवन्तीमिवादित्यादपश्यत्कपि-कुञ्जरः ॥
Metre: अनुष्टुप्
रोचमानः कु-दृष्टिभ्यो रक्षोभ्यः प्रत्तवान्श्रियम् । श्लाघमानः पर-स्त्रीभ्यस्तत्रऽऽगाद्राक्षसाऽधिपः ॥
Metre: अनुष्टुप्
अशप्त निह्नुवानोऽसौ सीतायौ स्मर-मोहितः । धारयान्निव चैतस्यै वसूनि प्रत्यपद्यत ॥
Metre: अनुष्टुप्
तस्यै स्पृहयमाणोऽसौ बहु प्रियमभाषत । सानुनीतिश्च सीतायै नऽक्रुध्यन्नाप्यसूयत ॥
Metre: अनुष्टुप्
"संक्रुध्यसि मृशा किं त्वं दिदृक्षुं मां मृगेक्षणे ! ।ईक्षितव्यं पर-स्त्रीभ्यः स्व-धर्मो रक्षसामयम् ॥
Metre: अनुष्टुप्
शृण्वद्भ्यः प्रतिशृण्वन्ति मध्यमा भीरु ! नोत्तमाः । गृणद्भ्योऽनुगृणन्त्यन्येऽकृताऽर्था नैव मद्-विधाः ॥
Metre: अनुष्टुप्
इच्छ स्नेहेन दीव्यन्ती विषयान्भुवनेश्वरम् । संभोगाय परिक्रीतः कर्तास्मि तव नाऽप्रियम् ॥
Metre: अनुष्टुप्
आस्स्व साकं मया सौधे माऽधिष्ठा निर्-जनं वनम् । माऽधिवात्सीर्भुवं शय्यामधिशेष्व स्मरोत्सुका ॥
Metre: अनुष्टुप्
अभिन्यविक्षथास्त्वं मे यथैवाऽव्याहता मनः । तवाऽप्यध्यावसन्तं मां मा रौत्सीर्हृदयं तथा ॥
Metre: अनुष्टुप्