परिशेषं न नामाऽपि स्थापयिष्यति ते विभुः ।अपि स्थाणुं जयेद्रामो भवतो ग्रहणं कियत् ॥
Metre: अनुष्टुप्
अपि स्तूह्यपिसेधाऽस्मांस्तथ्यमुक्तं नराऽशन् ! ।अपि सिञ्चेः कृशानौ त्वं दर्पं मय्यपि योऽभिकः ॥
Metre: अनुष्टुप्
अधिरामे पराक्रान्तमधिकर्ता स ते क्षयम्" ।इत्युक्त्वा मैथिली तूष्णीमासांचक्रे दशाननम् ॥
Metre: अनुष्टुप्
ततः खड्गं समुद्यम्य रावणः क्रूर-विग्रहः । वैदेहीमन्तरा क्रुद्धः क्षणमूचे विनिश्वसन् ॥
Metre: अनुष्टुप्
"चिरेणाऽनुगुणं प्रोक्ता प्रतिपत्ति-पराङ्मुखी । न मासे प्रतिपत्तासे मां चेन्मर्तासि मैथिलि !" ॥
Metre: अनुष्टुप्
प्रायुङ्क्त राक्षसीर्भीमा मन्दिराय प्रतिव्रजन् । "भयानि दत्त सीतायै सर्वा यूयं कृते मम।" ॥
Metre: अनुष्टुप्
गते तस्मिन्समाजग्मुर्भयाय प्रति मैथिलीम् । राक्षस्यो रावण-प्रीत्यै क्रूरं चोचुरलं मुहुः ॥
Metre: अनुष्टुप्
"रावणाय नमस्कुयाः स्यात्सीते ! स्वस्ति ते ध्रुवम् ।अन्यथा प्रातराशाय कुर्याम त्वामलं वयम् ॥
Metre: अनुष्टुप्
तृणाय मत्वा ताः सर्वा वदन्तीस्त्रिजटाऽवदत् । "आत्मानं हत दुर्वृत्ताः ! स्व-मांसैः कुरुताऽशनम् ॥
Metre: अनुष्टुप्
अद्य सीता मया दृष्टा सूर्यं चन्द्रमसा सह । स्वप्ने स्पृशन्ती मध्येन तनुः श्यामा सुलोचना ॥
Metre: अनुष्टुप्