अवाद्वायुः शनैर्यस्यां लतां नर्तयमान-वत् । नाऽऽयासयन्त संत्रस्ता ऋतवोऽन्योन्य-संपदः ॥
Metre: अनुष्टुप्
ज्योत्स्नाऽमृतं शशी वस्यां वापीर्विकसितोत्पलाः ।अपाययत संपूर्णः सदा दश-मुखाऽऽज्ञया ॥
Metre: अनुष्टुप्
प्रादमयन्त पुष्पेषुं यस्यां बन्द्यः समाहृताः । परिमोहयमाणाभी राक्षसीभिः समावृताः ॥
Metre: अनुष्टुप्
यस्यां वासयते सीतां केवलं स्म रिपुः स्मरात् । न त्वरोचयताऽऽत्मानं चतुरो वृद्धि-मानपि ॥
Metre: अनुष्टुप्
मन्दायमान-गमनो हरितायत्-तरुं कपिः । द्रुमैः शकशकायद्भिर्मारुतेनाऽऽट सर्वतः ॥
Metre: अनुष्टुप्
अस्यन्दन्निन्दु-मणयतो व्यरुचन्कुमुदाऽऽकराः ।अलोठिषत वातेन प्रकीर्णः स्तबकोच्चयाः ॥
Metre: अनुष्टुप्
सीताऽन्तिके विवृत्सन्तं वर्त्स्यत्-सिद्धिं प्लवङ्गमम् । पतत्रिणः शुभा मन्द्रमानुवानास्त्वजिह्लदन् ॥
Metre: अनुष्टुप्
वर्तिष्यमाणमात्मानं सीता पत्युरिवाऽन्तिके ।उदपश्यत्तदा तथ्यैर्निमित्तैरिष्ट-दर्शनैः ॥
Metre: अनुष्टुप्
"निरवर्त्स्यन्न चेद्वार्ता सीताया वितथैव नः ।अकल्प्स्यदुद्यतिः सर्वा" हनूमानित्यचिन्तयत् ॥
Metre: अनुष्टुप्
वृक्षाद्वृक्षं परिक्रामन्रावणाद्बिभ्यतीं भृशम् । शत्रोस्त्राणम-पश्यन्तीम-दृश्यो जनकाऽऽत्मजाम् ॥
Metre: अनुष्टुप्