अङ्गेन केनापि विजेतुमस्या गवेष्यते किं चलपत्रपत्रम् । न चेद्विशेषादितरच्छदेभ्यः तस्यास्तु काम्पस्तु कुतो भयेन ॥
Metre: उपजातिः
भ्रूश्चित्रलेखा च तिलोत्तमास्या नासा च रम्भा च यदूरुसृष्टिः । दृष्टा ततः पूरयतीयमेकान् एकाप्सरः प्रेक्षणकौतुकानि ॥
Metre: इन्द्रवज्रा
रम्भापि किं चिह्नयति प्रकाण्डं न चात्मनः स्वेन न चैतदूरु । स्वस्यैव येनोपरि सा ददाना पत्राणि जागर्त्यनयोर्भ्रमेण ॥
Metre: उपजातिः
विधाय मूर्धानमदश्चरं चेन्मुञ्चेत्तपोभिः स्मरसामभावम् । जाड्यं च नाञ्चेत्कदली बलीयस्तदा यदि स्यादिदमूरुचारुः ॥
Metre: उपजातिः
ऊरुप्रकाण्डद्वितयेन तन्व्याः करः पराजीयत वारणीयः । युक्तं ह्रिया कुण्डलनच्छलेन गोपायति स्वं मुखपुष्करं सः ॥
Metre: उपजातिः
अस्यां मुनीनामपि मोहमूहे भृगुर्महान्यत्कुचशैलशीली । नानारदाह्लादि मुखं श्रितोरुः व्यासो महाभारतसर्गयोग्यः ॥
Metre: उपजातिः
क्रमाद्गता पीवरताधिजङ्घं वृक्षाधिरूढं विदुषी किमस्याः । अपि भ्रमीभङ्गिभिरावृताङ्गं वासो लतावेष्टितकप्रवीणम् ॥
Metre: उपजातिः
अरुन्धतीकामपुरंघ्रिलक्ष्मीजन्भद्विषद्दारनवाम्बिकानाम् । चतुर्दशीयं तदिहोचितैव गुल्फद्वयाप्ता यददृश्यसिद्धिः ॥
Metre: उपजातिः
अस्याः पदौ चारुतया महान्तावपेक्ष्य सौक्ष्म्याल्लवभावभाजः । जाता प्रवालस्य महीरुहाणां जानीमहे पल्लवशब्दलब्धिः ॥
Metre: उपजातिः
जगद्वधूमूर्धसु रूपदर्पाद्यदेतयादायि पदारविन्दम् । तत्सान्द्रसिन्दूरपरागरागैः ध्रुवं प्रवालप्रबलारुणं तत् ॥
Metre: उपजातिः