फलमलभ्यत यत्कुसुमैस्त्वया विषमनेत्रमनङ्ग ! विगृह्णता । अहदनीतिरवाप्तभया ततो न कुसुमैरपि विग्रहमिच्छति ॥
Metre: द्रुतविलम्बित
अपि धयन्नितरामरवत्सुधां त्रिनयनात्कथमापिथ तां दशाम् । भण रतेरधरस्य रसादरात् अमृतमाप्तघृणः खलु नापिबः ॥
Metre: द्रुतविलम्बितम्
भुवनमोहनजेन किमेनसा तव बभूव परेत ! पिशाचता । यदधुना विरहाधमलीमसाम् अभिभवन्भ्रमसि स्मर ! मद्विधाम् ॥
Metre: द्रुतविलम्बितम्
बत ददासि न मृत्युमपि स्मर ! स्खलति तेऽकृपया न धनुः करात् । अथ मृतोऽसि मृतेन च मुच्यते न खलु मुष्टिरुरीकृतबन्धनः ॥
Metre: द्रुतविलम्बित
दृगुपहत्यपमृत्युविरूपताः शमयतेऽपरनिर्जरसेविता । अतिशयान्ध्यवपुःक्षतिपाण्डुताः स्मर ! भवन्ति भवन्तमुपासितुः ॥
Metre: द्रुतविलम्बित
स्मर ! नृशंसतमस्त्वमतो विधिः सुमनसः कृतवान्भवदायुधम् । यदि धनुर्दृढमाशुगमायसं तव सृजेत्त्रिजगत्प्रलयं व्रजेत् ॥
Metre: द्रुतविलम्बितम्
स्मररिपोरिव रोपशिखी पुरां दहतु ते जगतामपि मा त्रयम् । इति विधिस्त्वदिषून्कुसुमानि किं मधुभिरन्तरसिञ्चदनिर्वृतः ॥
Metre: द्रुतविलम्बितम्
विधिरनंशममेद्यमवेक्ष्य ते जनमनः खलु लक्षमकल्पयत् । अपि स वज्रमदास्यत चेत्तदा त्वदिषुभिर्वदलिष्यदसावपि ॥
Metre: द्रुतविलम्बितम्
अपि विधिः कुसुमानि तवाशुगान्स्मर ! विधाय न निर्वृतिमाप्तवान् । अदित पञ्च हि ते स नियम्य तांस्तदपि तैर्बत जर्जरितं जगत् ॥
Metre: द्रुतविलम्बित
उपहरन्ति न कस्य सुपर्वणः सुमनसः कति पञ्च सुरद्रुमाः । तव तु हीनतया पृथगेकिकां धिगियतापि न तेऽङ्ग ! विगर्हणा ॥
Metre: द्रुतविलम्बितम्