असितमेकसुराशितमप्यभून्न पुनरेष विधुर्विशदं विषम् । अपि निपीय सुरैर्जनितक्षयं स्वयमुदेति पुनर्नवमार्णवम् ॥
Metre: द्रुतविलम्बितम्
विरहिवर्गवधव्यसनाकुलं कलय पापमशेषकलं विधुम् । सुरनिपीतसुधाकरपापकं ग्रहविदो विपरीतकथाः कथम् ॥
Metre: द्रुतविलम्बितम्
विरहिभिर्बहुमानमवापि यः स बहुलः खलु पक्ष इहाजनि । तदमितिः सकलैरपि यत्र तैः व्यरचि सा च तिथिः किममाकृता ॥
Metre: द्रुतविलम्बितम्
स्वरिपुतीक्ष्णसुदर्शनविभ्रमात्किमु विधुं ग्रसते स विधुंतुदः । निपतितं वदने कथमन्यथा बलिकरम्भनिभं निजमुज्झति ॥
Metre: द्रुतविलम्बितम्
वदनगर्भगतं न निजेच्छया शशिनमुज्झति राहुरसंशयम् । अशित एव गलत्ययमत्ययं सखि ! विना गलनालबिलाध्वना ॥
Metre: द्रुतविलम्बितम्
ऋजुदृशः कथयन्ति पुराविदो मधुभिदं किल राहुशिरश्छिदम् । विरहिमूर्धमिदं निगदन्ति न क्व नु शशी यदि तज्जठरानलः ॥
Metre: द्रुतविलम्बितम्
स्मरसखौ रुचिभिः स्मरवैरिणा मखमृगस्य यथा दलितं शिरः । सपदि संदधतुर्भिषजौ दिवः सखि ! तथा तमसोऽपि करोतु कः ॥
Metre: द्रुतविलम्बितम्
नलविमस्तकितस्य रणे रिपोः मिलति किं न कबन्धगलेन वा । मृतिभिया भृशमुत्पततस्तम् आग्रहशिरस्तदसृग्दृढबन्धनम् ॥
Metre: द्रुतविलम्बितम्
सखि ! जरां परिपृच्छ तमः शिरः सममसौ दधतापि कबन्धताम् । मगधराजवपुर्दलयुग्मवत्किम् इति न व्यतिसीव्यति केतुना ॥
Metre: द्रुतविलम्बितम्
वद विधुंतुदमालि ! मदीरितैः त्यजसि किं द्विजराजधिया रिपुम् । किमु दिवं पुनरेति यदीदृशः पतित एष निषेव्य हि वारुणीम् ॥
Metre: द्रुतविलम्बितम्