यस्य त्वया व्रणविरोपणमिङ्गुदीनाम् तैलं न्यषिच्यत मुखे कुशसूचिविद्धे । श्यामाकमुष्टिपरिवर्धितको जहाति सोऽयं न पुत्रकृतकः पदवीं मृगस्ते ॥
Metre: वसन्ततिलका
वत्स किं सहवासपरित्यागिनीं मामनुसरसि ।अचिरप्रसूतया जनन्या विना वर्धित एव ।इदानीमपि मया विरहितं त्वां तातश्चिन्तयिष्यति । निवर्तस्व तावत् । (इति रुदती प्रस्थिता)
उत्पक्ष्मणोर्नयनयोरुपरुद्धवृत्तिम् बाष्पं कुरु स्थिरतया विरतानुबन्धम् ।अस्मिन्नलक्षितनतोन्नतभूमिभागे मार्गे पदानि खलु ते विषमीभवन्ति ॥
Metre: वसन्ततिलका
भवगान् ।ओदकान्तं स्निग्धो जनोऽनुगन्तव्य इति श्रूयते ।
तदिदं सरस्तीरम् ।अत्र संदिश्य प्रतिगन्तुमर्हति ।
तेन हीमां क्षीरवृक्षछायामाश्रयामः ।
(सर्वे परिक्रम्य स्थिताः )
(आत्मगतम्) किं नु खलु तत्रभवतो दुष्यन्तस्य युक्तरूपमस्माभिः संदेष्टव्यम् । (इति चिन्तयति)