मृत्योरिवोग्र-दण्डस्य राज्ञो यान्ति वशं द्विषः । सर्वंसहं तु मन्यन्ते तृणाय रिपवश्च तम् ॥
Metre: अनुष्टुप्
न जातु शमनं यस्य तेजस्तेजस्वि-तेजसाम् । वृथा जातेन किं तेन मातुर्यौवन-हारिणा ॥
Metre: अनुष्टुप्
या लक्ष्मीर्नानुलिप्ताङ्गी वैर्-शोणित-कुङ्कुमैः । कान्तापि मनसः प्रीतिं न सा धत्ते मनस्विनाम् ॥
Metre: अनुष्टुप्
रिपु-रक्तेन संसिक्ता तत्-स्त्री-नेत्राम्बुभिस्तथा । न भूमिर्यस्य भूपस्य का श्लाघा तस्य जीविते ॥
Metre: अनुष्टुप्
बलोत्कटेन दुष्टेन मर्यादा-रहितेन च । न सन्धि-विग्रहौ नैव विना यानं प्रशस्यते ॥
Metre: अनुष्टुप्
द्विधाकारं भवेद्यानं भवेत्प्राणार्थ-रक्षणम् । एकमन्यज्जिगीषोश्च यात्रालक्षणमुच्यते ॥
Metre: अनुष्टुप्
कार्त्तिके वाथ चैत्रे वा विजिगीषोः प्रशस्यते । यानमुत्कृष्ट-वीर्यस्य शत्रु-देशे न चान्यदा ॥
Metre: अनुष्टुप्
अवस्कन्द-प्रदानस्य सर्वे कालाः प्रकीर्तिताः । व्यसने वर्तमानस्य शत्रोच्छिद्रान्वितस्य च ॥
Metre: अनुष्टुप्
स्वस्थानं सुदृढं कृत्वा शूरैश्चातैर्महाबलैः । पर-देशं ततो गच्छेत्प्रणिधि-व्याप्तमग्रतः ॥
Metre: अनुष्टुप्