भूमिर्मित्रं हिरण्यं वा विग्रहस्य फल-त्रयम् । नास्त्येकमपि यद्येषां विग्रहं न समाचरेत् ॥
Metre: अनुष्टुप्
खनन्नाखु-बिलं सिंहः पाषाण-शकलाकुलम् । प्राप्नोति नख-भङ्गं हि फलं वा मूषको भवेत् ॥
Metre: अनुष्टुप्
तस्मान्न स्यात्फलं यत्र पुष्टं युद्धं तु केवलम् । न हि तत्स्वयमुत्पाद्यं कर्तव्यं न कथञ्चन ॥
Metre: अनुष्टुप्
बलीयसा समाक्रान्तो वैतसीं वृत्तिमाश्रयेत् । वाञ्छन्नभ्रंशिनीं लक्ष्मीं न भौजङ्गी कदाचन ॥
Metre: अनुष्टुप्
कुर्वन्हि वैतसीं वृत्तिं प्राप्नोति महतीं श्रियम् । भुजङ्ग-वृत्तिमापन्नो वधमर्हति केवलम् ॥
Metre: अनुष्टुप्
कौर्मं सङ्कोचमास्थाय प्रहारानपि मर्षयेत् । काले काले च मतिमानुत्तिष्ठेत्कृष्ण-सर्पवत् ॥
Metre: अनुष्टुप्
आगतं विग्रहं विद्वानुपायैः प्रशमं नयेत् । विजयस्य ह्यनित्यत्वाद्रभसेन न सम्पतेत् ॥
Metre: अनुष्टुप्
बलिना सह योद्धव्यमिति नास्ति निदर्शनम् । प्रतिवातं न हि घनः कदाचिदुपसर्पति ॥
Metre: अनुष्टुप्
शत्रुणा न हि सन्दध्यात्सुश्लिष्टेनापि सन्धिना । सुतप्तमपि पानीयं शमयत्येव पावकम् ॥
Metre: अनुष्टुप्