तस्मादेकान्तमासाद्य कार्यो मन्त्रो महीपते । येन तस्य वयं कुर्मो नियमं कारणं तथा ॥
Metre: अनुष्टुप्
बलीयसि प्रणमतां काले प्रहरतामपि । सम्पदो नावगच्छन्ति प्रतीपमिव निम्नगाः ॥
Metre: अनुष्टुप्
सत्याढ्यो धार्मिकश्चार्यो भ्रातृ-सङ्घातवान्बली । अनेक-विजयी चैव सन्धेयः स रिपुर्भवेत् ॥
Metre: अनुष्टुप्
सन्धिः कार्योऽप्यनार्येण विज्ञाय प्राण-संशयम् । प्राणैः संरक्षितैः सर्वं यतो भवति रक्षितम् ॥
Metre: अनुष्टुप्
अनेक-युद्ध-विजयी सन्धानं यस्य गच्छति । तत्-प्रभावेण तस्याशु वशं गच्छन्त्यरातयः ॥
Metre: अनुष्टुप्
सन्धिमिच्छेत्समेनापि सन्दिग्धो विजयी युधि । न हि सांशयिकं कुर्यादित्युवाच बृहस्पतिः ॥
Metre: अनुष्टुप्
सन्दिग्धो विजयो युद्धे जनानामिह युद्ध्यताम् । उपाय-त्रितयादूर्ध्वं तस्माद्युद्धं समाचरेत् ॥
Metre: अनुष्टुप्
असन्दधानो मानान्धः समेनापि हतो भृशम् । आमकुम्भमिवाभित्त्वा नावतिष्ठेत शक्तिमान् ॥
Metre: अनुष्टुप्
समं शक्तिमता युद्धमशक्तस्य हि मृत्यवे । वृषत्कुम्भं यथा भित्त्वा तावत्तिष्ठति शक्तिमान् ॥
Metre: अनुष्टुप्