जिह्वा-लौल्य-प्रसक्तानां जल-मध्य-निवासिनाम् । अचिन्तितो वधोऽज्ञानां मीनानामिव जायते ॥
Metre: अनुष्टुप्
अथवा दैव-प्रतिपतिकूलतया भवत्येवम् । न तस्य दोषोऽस्ति । उक्तं च—
पौलस्त्यः कथमन्य-दार-हरणे दोषं न विज्ञातवान्रामेणापि कथं न हेम-हरिणस्यासम्भवो लक्षितः । अक्षैश्चापि युधिष्ठिरेण सहसा प्राप्तो ह्यनर्थः कथं प्रत्यासन्न-विपत्ति-मूढ-मनसां प्रायो मतिः क्षीयते ॥
Metre: शार्दूलविक्रीडितम्
कृतान्त-पाश-बद्धानां दैवोपहत-चेतसाम् । बुद्धयः कुब्ज-गामिन्यो भवन्ति महतामपि ॥
Metre: अनुष्टुप्
अत्रान्तरे लुब्धकस्तान्बद्धान्विज्ञाय प्रहृष्ट-मनाः प्रोद्यत-यष्टिस्तद्-वधार्थं प्रधावितः । चित्रग्रीवोऽप्यात्मानं स-परिवारं बद्धं मत्वा लुब्धकमायान्तं दृष्ट्वा तान्कपोतानूचे-अहो, न भेतव्यम् । उक्तं च—
व्यसनेष्वेव सर्वेषु यस्य बुद्धिर्न हीयते । स तेषां पारमभ्येति तत्-प्रभावादसंशयम् ॥
Metre: अनुष्टुप्
सम्पत्तौ च विपत्तौ च महतामेक-रूपता । उदये सविता रक्तो रक्तश्चास्त-मये तथा ॥
Metre: अनुष्टुप्
तत्सर्वे वयं हेलयोड्डीय स-पाश-जाला अस्यादर्शनं गत्वा मुक्तिं प्राप्नुमः । नो चेद्भय-विक्लवाः सन्तो हेलया समुत्पातं न करिष्यथ । ततो मृत्युमवाप्स्यथ । उक्तं च—
तन्तवोऽप्यायता नित्यं तन्तवो बहुलाः समाः । बहून्बहुत्वादायासान्सहन्तीत्युपमा सताम् ॥
Metre: अनुष्टुप्