सत्य-धर्म-विहीनेन न सन्दध्यात्कथञ्चन । सुगन्धितोऽप्यसाधुत्वादचिराद्याति विक्रियाम् ॥
Metre: अनुष्टुप्
तस्मात्तेन योद्धव्यमिति मे मतिः । उक्तं च यतः—
क्रूरो लुब्धोऽलसोऽसत्यः प्रमादी भीरुरस्थिरः । मूढो योधावमन्ता च सुखोच्छेद्यो भवेद्रिपुः ॥
Metre: अनुष्टुप्
अपरं तेन पराभूता वयम् । तद्यदि सन्धान-कीर्तनं करिष्यामस्तद्भूयोऽत्यन्तं कोपं करिष्यति । उक्तं च—
चतुर्थोपाय-साध्ये तु रिपौ सान्त्वमपक्रिया । स्वेद्यमाम-ज्वरं प्राज्ञः कोऽम्भसा परिषिञ्चति ॥
Metre: अनुष्टुप्
सामवादाः सकोपस्य शत्रोः प्रत्युत दीपिकाः । प्रतप्तस्येव सहसा सर्पिषस्तोय-बिन्दवः ॥
Metre: अनुष्टुप्
प्रमाणाभ्यधिकस्यापि महत्-सत्त्वमधिष्ठितः । पदं मूर्ध्नि समाधत्ते केसरी मत्त-दन्तिनः ॥
Metre: अनुष्टुप्
उत्साह-शक्ति-सम्पन्नो हन्याच्छत्रुं लघुर्गुरुम् । यथा कण्ठीरवो नागं भारद्वाजः प्रचक्षते ॥
Metre: अनुष्टुप्
मायया शत्रवो वध्या अवध्याः स्युर्बलेन ये । यथा स्त्री-रूपमास्थाय हतो भीमेन कीचकः ॥
Metre: अनुष्टुप्