अज्ञातवी-वधासार-तोय-शस्यो व्रजेत्तु यः । पर-राष्ट्रं न भूयः स स्व-राष्ट्रमधिगच्छति ॥
Metre: अनुष्टुप्
तत्ते युक्तं कर्तुमपसरणम् । अन्यच्च—
तन्न युक्तं प्रभो कर्तुं द्वितीयं यानमेव च । न विग्रहो न सन्धानं बलिना तेन पापिना ॥
Metre: अनुष्टुप्
अपरं कारणापेक्षयापसरणं क्रियते बुधैः । उक्तं च—
यदपसरति मेषः कारणं तत्प्रहर्तुं मृग-पतिरपि कोपात्सङ्कुचत्युत्पतिष्णुः । हृदय-निहित-भावा गूढ-मन्त्र-प्रचाराः किमपि विगणयन्तो बुद्धिमन्तः सहन्ते ॥
Metre: मालिनी
बलवन्तं रिपुं दृष्ट्वा देश-त्यागं करोति यः । युधिष्ठिर इवाप्नोति पुनर्जीवन्स मेदिनीम् ॥
Metre: अनुष्टुप्
युध्यतेऽहङ्कृतिं कृत्वा दुर्बलो यो बलीयसा । स तस्य वाञ्छितं कुर्यादात्मनश्च कुल-क्षयम् ॥
Metre: अनुष्टुप्
तद्बलवताभियुक्त्स्यापसरण-समयोऽयं न सन्धेर्विग्रहस्य च । एवमनुजीवि-मन्त्रोऽपसरणस्य ।
अथ तस्य वचनमाकर्ण्य प्रजीवनमाह-भद्र ! त्वमप्यात्मनोऽभिप्रायं वद ।